Ordinansa sa OJT sa mga estudyante, aprobado sa Buenavista
BUENAVISTA, Agusan del Norte -- Andam na modawat ang LGU sa Buenavista para sa On-the-Job Training (OJT) sa mga estudyante nga gikan sa nagkalain-lai’ng pampubliko o pribado’ng skwelahan sa lungsod sa Buenavista pinaagi sa Municipal Ordinance No. 005-2023 nga gideklarang balido sa Sangguniang Panlalawigan.
Ang maong lakang usa sa mga gideklara’ng polisiya sa LGU Buenavista aron maplastar ang mga graduating students para sa OJT isip training ground sa ilang mga related nga kurso para mahuman.
Ang OJT nga programa maghatag sa mga studyante og oportunidan nga ma-expose sa aktuwal nga trabahu ug serbisyo sa ilang tagsa-tagsa ka kurso ug mahatagan sila og praktikal nga kasinatian ug paggamit sa kahibalo nga nakuha sa classroom.
Usa sa mga pamaagi sa pagdawat sa mga studyante nga internship/OJT sa nasangpit nga LGU isip kabahin sa ilang gikinahanglan nga kurso mao ang pagpahigayon og MOA nga permirmahan sa representante sa LGU ug applicant-school, nga nagtakda sa mga termino ug kondisyon sa internship nga graduating nga mga estudyante.
Ang maong lakang ubos kini sa Section 447 of the Local Government Code of 1991. Kini giaprobahan sa Sanguniang Panlalawigan pinaagi sa Sangunian Resolution No. 200-2023, sa pagpaningkamot ni Bokal Rodulfo A. Pitogo, tsirman sa Committee on Human Resource Development, Labor and Employment. (Ramil L. Pasco, PLGU Agusan del Norte/PIA Agusan del Norte)
