Lumulupyo sa Angels Village may libreng housing materials, pasuga
Kini ang tubag ni Gob. Angel Amante sa yangungu nga problema sa mga lumolupyo atol sa iyang pagbisita niadtong Abril 14 didto mismo sa maong barangay uban ang konseho ug lumulupyo sa Angels Village.
Sumala pa ni Reynaldo Laput, kapitan sa Brgy. Sanghan, dugay na kini sila naglisod sa ilang pamuyo tungod kay walay tarong nga atop ug ngitngit ang pipila ka balay niini. Dugang ni Laput, adunay 99 ka household ang nagpuyo sa Angels Village diin 28 ka household ang walay suga samtang 21 ka pamilya niini ang walay atop sa balay.
Isip tubag sa gobernador, mohatag ciya ug tag P4,000 sa 28 ka pamilya isip ilang bayad pagpataud ug kuryente lakip na ang bayad sa labor niini.
Samtang ang 21 ka pamilya, sugyot ni Amante nga kuhaon kini nga pundo sa buhatan sa kongresista sa ilang shelter assistance alang sa pagpalit ug materyales niini. Modugang usab ug assistance ang probinsya pinaagi sa buhatan sa Provincial Social Welfare and Development (PSWD).
Daku usab ang pagpasalamat sa mga lumolupyo sa Angels Village tungod sa dali nga aksyon sa ilang hangyo nga masulbad kini nga problema. (Karen Decamotan, PLGU Agusan del Norte/PIA Agusan del Norte)
