Monday, March 6, 2023

Pagpalambo sa kapasidad sa LGU Las Nieves, gitutukan

LUNGSOD SA LAS NIEVES, Agusan del Norte -- Usa sa gihimong prayoridad sa lungsod sa Las Nieves ni ni Mayor Karen Rosales para sa tuig 2023 mao ang pagpalambo sa kapasidad sa lokal nga panggamhan. Kini aron mas mohapsay pa ang pagpadagan sulod sa lokal nga panggamhan tinguha nga makab-ot ang katuyoan ug damgo para sa lungsod nga magdala sa kabag-uhan, kalamboan, ug ang padayun nga serbisyo sa katawhan. 

Isip unang lakang, gipahigayon niadtong Huwebes sa buntag ang oryentasyon kabahin sa pagmugna sa local government unit (LGU) Capacity Development (CapDev) Agenda. 

Ang CapDev Agenda usa ka komprehensibong plano sulod sa tulo (3) ka tuig nga mao ang mamahimong giya diha sa pag-implementar sa mga inisyatibo kabahin sa pagpalambo sa kapasidad sa usa ka lokal nga panggamhan. 

Gipahigayon ang maong oryentasyon sa Mayor's Conference Room asa gitambungan sa mga hepe ug representante sa nagkadaiyang buhatan. 

Nanguna sa maong oryentasyon si Cynthia Binondo, ang Municipal Local Government Operations Officer sa lungsod. 

Iyang gihatagan og katin-awan ang mga angay hatagan ug konsiderasyon diha sa pagmugna sa CapDev Agenda. 

Iya usab gipasabot ang mga hepe sa ilang importanteng papel diha sa pagmugna sa maong three-year plan. 

"Kita isip mga head of office adunay dakong tahas diha sa pagkab-ot sa vision sa atong LGU, mao nga ato na kining sugdan kay ug dili karon, kanus-a paman?," hagit ni Binondo ngadto sa mga hepe. 

Sa mga musunod nga adlaw adunay pagahimoon nga ikaduhang hugna nga panaghinisgutay mahitungod sa pagmugna sa CapDev Agenda. (LGU Las Nieves/PIA Agusan del Norte)