State of calamity sa lungsod sa Las Nieves, giaprobahan
Kini human makasinati ang lungsod og mga danyos sa imprastraktura, kaumahan, ug ingon man mga pamilya nga mibakwit tungod sa walay hunong ug kusog nga pag-ulan dala sa low pressure area kaniadtong Pebrero 17, 2023.
Walo (8) ka mga barangay usab ang gipailalum sa state of calamity nga gilangkuban sa E.G Montilla, Pinanaan, Ambacon, Maningalao, San Isidro, Katipunan, Bonifacio, ug Tinucoran.
Atol sa maong meeting, gihatagag gibug-aton ni Mayor Karen Rosales ang
pagpangandam panahon sa mga katalagman sama sa bagbaha. Subay niini, iyang
gilatid ang pagpatuman og Camp Management Training alang sa tanang barangay sa
Las Nieves.
“Importante nga mabansay ang mga evacuees kung unsa ang angay buhaton panahon nga mobalhin na sila sa evacuation centers alang sa ilang seguridad,” matud pa ni Mayor Karen.
Sa inisyal nga nasabutan sa komitiba, nahiusahan nga gahinan og cash assistance ang mga mag-uuma nga naapektohan sa pagbaha.
Kini subay sa pagtino nga gihimo ni Jover Manliguez, ang hepe sa Municipal Disaster Risk Reduction Management Office, mahitungod sa mga tabang nga igahin sa lokal nga panggamhanan ngadto sa mga apektadong mag-uuma sa lungsod.
Kinahanglan usab nga magpagawas og report kabahin sa mga danyos nga nasinati sa mga mag-uuma, ilabi na sa ilang mga pananom sa milabay nga pagbaha. (LGU Las Nieves/PIA Agusan del Norte)
