DPWH giturn-over ang regional evacuation center sa Las Nieves
DAKBAYAN SA BUTUAN -- Agi’g kabahin sa inisyatibo sa Probinsyal nga Panggamhanan sa Agusan del Norte ubos sa pagdumala ni Gob. Ma. Angelica Rosedell M. Amante, pinaagi sa Provincial Disaster Risk Reduction and Management Office (PDRRMO) kaabag ang Local Risk Reduction and Management Office (LDRRMO) sa Las Nieves, naangkon na sa katawhan sa lungsod sa Las Nieves ang usa ka bag-ong Regional Evacuation Center nga nahimutang sa Purok -8 sa Barangay San Isidro.
Gitunol sa Rehiyonal nga Buhatan sa Department of Public Works and Highways (DPWH-13) ang balor Php34 Milyon nga pasilidad ngadto sa Lokal nga Panggamhanan sa Las Nieves kaniadtong Enero 19.
Gisugdan ang konstraksyon niadtong tuig 2018 ug makapahiluna kini sa gibana-bana nga 144 ka pamilya o 724 ka mga indibidwal.
Nakita sa administrasyon ni Gob. Angel Amante inabagan sa buhatan ni Kong. Dale B. Corvera ang panginahanglanon sa mga residente sa maong barangay ingon man ang tibuok lungsod sa Las Nieves tungod kay usa kini sa labing maapektohan panahon sa pagbaha o mga kalamidad.
Sa maong turn-over ceremony, gipaabot usab ni Las Nieves Mayor Karen Rosales ang iyang dakong pagpasalamat sa mga lideres sa kagamhanang lokal ug ahensya lakip na ang pagpadayag sa iyang dakong kalipay nga natuman na ang dugay gipangandoy sa mga residente niini.
"Aduna na gayud kitay sakto nga
pasilidad nga makapanalipod sa katawhan panahon sa kalamidad ug uban pang
katalagman,” sumala pa ni Mayor Rosales.
Mapasalamaton usab ang mga residente sa San Isidro sa pagpanguna ni Kapitan Melecio B. Siega. (Karen Decamotan, LGU Agusan del Norte, hulagway kuha sa LGU-Las Nieves/PIA Agusan del Norte)
