Butuan City Electronic Payment System Ordinance of 2022, aprobado na
DAKBAYAN SA BUTUAN – Giaprobahan na ni Mayor Ronnie Vicente Lagnada ang SP Ordinance No. 6662-2022 o ang ordinansa nga pag-institutionalize sa paggamit sa electronic payment system sa tanang financial transactions sa City Government sa Butuan.
Ang ordinansa gipangamahan ni Konsehal John Gil Unay Sr., Chairman sa Committee on Ways & Means kaabag sila Konsehala Cherry May Busa, Chairman sa Komitiba sa Science & Technology nga maoy Sponsor sa nasangpit nga lokal nga balaudnon ug gisuportahan ni Vice Mayor Law Fortun.
Sa pagpatuman niini dunay sundon nga mga palisiya ug guidelines subay sa ipagawas nga Executive Order ni Mayor Lagnada. Kabahin usab sa liquidation sa collection sa e-payment system dunay gitahasan nga mga personahe aron mamahimong epektibo ug episyente ang pagpatuman sa bag-ong sistema.
Nakalatid usab sa section 7 sa ordinansa nga dili mandatory ang bag-ong sistema, optional kini ug pwede gihapon sa paaging over the counter ang payment sa mga transaksyon sa City Government.
Ang pag Institutionalize sa E-payment system alayon sa tumong nga mamahimong SMART-ECO City ang dakbayan. Ang nasangpit nga ordinansa subay sa RA no. 11032 o mas naila nga An Act Promoting Ease of Doing Business ug Efficient Delivery sa Government Services, sa katuyuan nga pag amyenda sa RA No. 9485 o mas naila nga Anti Red Tape Act sa 2007. Dinhi gideklara ang mga palisiya aron pagpromote sa integridad, accountability, saktong pagdumala sa public affairs ug public property pinaagi sa pagpatuman ug pagestablesar sa mga best practices aron malikayan ang korapsyon diha sa panudlanan sa gobyerno. (Butuan City PIO/PIA Agusan del Norte)
