Kapin 200 ka mga mag-uuma misalmot sa Agriboost Farmers Field Day on Vegetable Production Technologies
DAKBAYAN SA BUTUAN -- Gipahigayon ang Agriboost Farmers Field Day on Vegetable Production Technologies sa pagpanguna sa Butuan City Agriculturist Office uban sa mga seeds company nga boluntaryong nagdemo sa ilang mga vegetable production protocols kaniadtong lunes, August 1. Gisalmutan kini sa kapin 200 ka mga mag-uuma sa syudad.
Ang aktibidad gipahigayon aron ang tanan maka obserba, makatandi ug makadayeg sa nagkalain-laing gipakitang vegetable agribusiness model asa pwedeng makopya o masundog sa komunidad. Katuyuan sab niini aron mapalambo ang kapasidad isip mga mag-uuma sa gulay sa ingon mutaas ang lokal vegetable production, mutaas ang kita sa matag panimalay ug makab-ot ang food security sa matag pamilya.
Nagpasalamat ang usa ka mag-uuma ug Nongnong Farmers Association Chairman nga si Shiela Maglines sa kahigayunang nakatuon pinaagi sa FFS tungod nakat-unan niini ang mga bag-ong teknolohiya nga makatabang sa iyang kaumahan.
Mahinumduman nga gimugna ang Farmers Field School kun FFS sa pagpanguna sa City Agriculturist Office bulan sa Mayo tuig 2022 nga molungtad hangtud bulan sa Septyembre tuig 2022. Kini aron masayran ang katakus ug kaalam sa mga mag-uuma sa vegetable production ug pinaagi niini madugangan ug mapalambo pa ang kahibalo alang sa malahutayong panguma.
Mitambong sa Farmers Field Day sila City Councilor Arturo Gado Committee Chair on Agriculture, Fisheries and Agro-Forestry, Konsehal Cherry May Busa Committee Chair on Science and Technology, Konsehal Rey Desiata Committee Chair on Urban Planning and Infrastructure, Caraga State University, DTI,DOST, DA Caraga ug uban pang mga bisita nga mipasalig sa padayong pagpadako sa suporta sa sektor sa mga mag-uuma aron magmalahutayon ang tanang programa ug proyekto nga nasugdan.
Kini nga kalihokan usa sa pagpatuman sa Agriboost Project nga nagpakita sa lain-laing vegetable production nga misunod sa bag-ong teknolohiya asa hugtanung gisuportahan ni Mayor Ronnie Vicente Lagnada pinaagi sa City Agriculturist Office. (Butuan City PIO/PIA Agusan del Norte)
