Groundbreaking sa P222 Milyones nga Provincial Road sa Jabonga, gihimo
DAKBAYAN SA BUTUAN -- Gihimo ang usa ka groundbreaking ceremony alang sa proyektong Upgrading/Improvement of Jabonga-Badiang-Magdagooc Provincial Coastal Road sa lungsod sa Jabonga, Agusan del Norte nga nag kantidad og Php222 milyones nga gi-alokar nga pundo niini.
Ang Php222 milyones nga proyekto, bunga sa pagpaningkamot ni kanhi gobernador Dale B. Corvera nga kongresista na karon sa ika duhang distrito sa probinsya aron mapundohan ang maong dakung proyekto ubos sa panudlanan sa 20% Development Fund sa probinsya ug gipatuman na kini karon ni Gob. Angel Amante.
Sumala pa ni Gob. Amante, daku kaayo ang iyang pagtahod kang Kong. Corvera tungod natuman na gyud ang maong proyekto human sa iyang pagbubo og budget niini panahon sa kanhing administrasyon.
“We really appreciate Governor Dale (Corvera), wala siyay lain
gibutangan sa iyang pundo for this year (2022) except to finish this project
because for the longest time, mao gyud na ang problema. That is the work of
Gob. Corvera” matud pa ni Gob. Amante sa iyang mensahe.
Dugang sa gobernador, daghan pa nga mga proyekto ang mabuboan og pundo sa lungsod sa Jabonga tungod sa hiniusang pagpaningkamot nga gibuhat sa mga dagkung lideres sa probinsya ug lokal.
Hangyo lang ni Gob. Amante sa katawhan sa Jabonga ilabina ngadto sa empleyado sa munisipyo nga mas mo-suporta ug mamahimo maningkamot pa nga mapadangat ang mga batakang serbisyo ngadto sa mga Jabonganon alang mahimong magmalambuon pa ang lungsod niini ingon man ang tibuok probinsya.
Gipaabot usab ni Kong. Dale B. Corvera ang iyang mensahe, nga gi-representahan sa iyang Congressional District Services Coordinator nga si Orencio Corvera nga andam motabang ug mosuporta ang buhatan sa Congressional District sa mga kalihukan ug programa sa lokal nga panggamhanan alang sa kalambuan sa probinsya.
Ang nasangpit nga proyekto, mokabat sa 5.7 kilometros ang kalay-on nga mahimong konkretong kalsada sa coastal areas sa maong lugar diin apil maka-benipisyo ang 3 ka barangays mao ang Poblacion, Sto. NiΓ±o ug Madagooc. (KKD, LGU Agusan del Norte/PIA Agusan del Norte)
