POPCOM Caraga, Cabadbaran gipakusgan kampanya batok sa pagmabdos sa kabatan-onan
BUENAVISTA, Agusan del Norte -- Ang Commission on Population and Development – Caraga hugot nga gasuporta sa inisyatabo nga gipangunahan sa lokal nga panggamhanan sa siyudad sa Cabadbaran, Agusan del Norte para masulbad ang makalilisang na pagdagsang sa mga batan-ong mabdos sa siyudad pinaagi sa serbisyo ug impormasyon.
Niining bahina, ang Cabadbaran District Hospital magpasiugda og Usapang Buntis Kasama ang Mahal sa Buhay nga aktibidad para sa mga batan-ong mabdos karon Mayo 27, 2022 ug June 10, 2022 sa Cabadbaran City. Ang tumong sa maong aktibidad ang pagtudlo sa hustong pag-atiman sa panglawas sa inahan, pag-atiman sa bag-ong natawo ug family planning. Dugang pa niini, ang nasangpit nga aktibidad ang paagi sa pagpaambit sa mga kasinatian, mga hagit ug pagmugna sa mga umaabot na plano isip usa ka inahan ug indibidwal.
Si Janus Anthony H. Raganas, ang Responsible Parenthood and Family Planning (RP-FP) Program Manager sa POPCOM Caraga magpaambit sa iyang kahanas sa hilisgutan sa family planning sa mga batan-ong mabdos para sa pagpanalipod sa ila sa pisikal, emosyonal ug pinansyal nga palas-onon sa wala planoha nga pagmabdos.
Ang POPCOM misaad nga magpadayon sa pagduso nga mapugngan ang pagmabdos sa mga batan-on sa rehiyon. (POPCOM Caraga/PIA Agusan del Norte)
