SP AgNor hugtan ang ilegal nga pagbaligya og produktong dili FDA-registered
DAKBAYAN SA BUTUAN -- Giaksyonan sa Sangguniang Panlalawigan sa Agusan del Norte sa Committee of the Whole bag-ohay pa lamang ang usa ka reklamo gikan sa konsamante laban sa usa ka haplas nga gialigahan nga wala pay Certificate of Product Registry (CPD) gikan sa Food and Drug Administration (FDA).
Atol sa meting sa pagpanguna ni Board Member Elizabeth Marie Calo niadtong Marso 16, nahisgutan ang kabahin sa pagmugna og saktong regulasyon ug disposisyon sa mga tambal nga ilegal nga gipamaligya sa mga parmasya sa probinsya.
Human ang masusing diskusyon, nagkahiusa ang maong komitiba nga magbuhat og ordinansa ang SP aron mamahimong sumbanan sa insaktong aksyon batok sa mga manufacturer ug seller nga namaligya og dili aprobado o rehistradong produkto sa FDA.
Gitambungan usab ang committee meeting nila ni Bokal Rodulfo Pitogo, Francisco Chan, Jr., Dick Victor Carmona, Meriam Pagaran, Keefe Blue Leonar, Nieva Famador, Erwin Dano, Virgilio Escasiñas, Jr., Benjamin Lim, Jr. uban ang mga representante sa FDA ug CIDG lakip na usab ang complainant nga si Marianita P. Anciano kauban ang iyang Legal Counsel nga si Atty. Gene Prisco.
Tungod niini, gipasar sa Sangguniang Panlalawigan ang Provincial Resolution No. 153-2022 sa pagpangunahan ni Bokal Calo nga naghangyo sa FDA nga magpahigayon og tukmang imbestigasyon sa mga manufacturer dinhi sa probinsya nga nakasupak sa balaod subay sa RA No. 9711 o ang FDA Act of 2009. Tumong niini nga mapahamtangan sa saktong disiplina ug penalidad ang mga nisupak sa maong balaod.
Ang maong resolusyon giaprobahan kaniadtong Marso 21, 2022 atol sa ika-130th regular session sa SP. (AgNor Bulletin/PIA-Agusan del Norte)
