Tuesday, March 15, 2022

Temporaryong pagtaas sa pletihan sa motorized tricycle sa Tubay giaprubahan

DAKBAYAN SA BUTUAN -- Giaprubahan bag-ohay pa lamang sa Sangguniang Panlalawigan sa Agusan del Norte ang Municipal Ordinance No. 2021-118 nga gikan sa Lokal nga Panggamhanan sa Tubay nga temporaryong patas-an ang plete sa mga pampublikong motorized tricycle sa nasangpit nga lungsod.

Ang maong lakang gipangamahanan ni Sangguniang Bayan Member Anacleto Page, Jr., nga nagtumong matabangan mausbawan ang kita sa transport sector nga maoy dako nga naapektohan sa kasamtangan nga regulasyon nga tulo lang ka minimum nga pasahero ang pasakyon aron masunod ang health protocol ilabina sa panahon sa pandemya.

Patas-an ang plete ngadto sa PhP10 hangtod sa PhP30 depende sa lugar nga ilang adtoan ug adunay special fare discount nga 20% ang tanan estudyante, PWD, ug senior citizen.

Subay usab sa maong mando nga exempted ang bata nga nagedad 7 ka tuig paubos sa pagbayad sa plete kong sila giuban sa mga hamtong na og pangidaron ug tanan driver kinahanglan magsul-ob og polo o t-shirt, pantalon, ug sapatos.

Ang makasupak sa maong balaod pahamtangan og multa nga PhP500 hangtod PhP1,000 ug cancellation of franchise.

Base sa rekomendasyon sa SP Committee on Energy and Transportation diin tsirman si Bokal Erwin Dano, ang maong municipal ordinance naaprobahan pinaagi sa Sanggunian Resolution No. 124-2022 atol sa sesyon regular niadtong Pebrero 28. (Shena Mae Pabia, LGU-Agusan del Norte/PIA-Agusan del Norte)