Agus Blend midagayday sa Butuan
DAKBAYAN SA BUTUAN -- Midagayday ang “Agus Blend” sa SM City Butuan sa gipahigayon sa Department of Trade and Industry (DTI) nga "Buy Caraga, By Caraga Christmas Edition Trade Fair" sugod niadtong Disyembre 4 hangtud 10.
Ang Agus Blend, mao ang kape sa proyektong “Coffee Net," usa sa mga 15 ka Core Processing Projects ubos sa Process! Process! Process! Project sa AGUSAN UP!, ang kampanya sa ekonomikanhong pagpalambo sa probinsya ilawom sa administrasyon ni Gob. Dale B. Corvera kaabag ang buhatan ni Kongw. Angel Amante-Matba.
Isip kabahin sa kalihukan, nagpahigayon adtong Lunes, Disyembre 6, og libreng Coffee Tasting ang DTI lakip na og pagpakita sa katawhan sa mga pamaagi ug proseso sa pag-brew sa kape.
Apil sa mga kape nga gi-display sa maong trade fair ang produktong kape sa mosunod nga mga organisasyon sa mag-uuma mao ang: Simbalan Integrated Farmers Association Inc. (SIFAI) ug Sitio Antipolo Farmers Association of Buenavista, Inc. (SAFABAI) sa Buenavista ubos sa "Coffee Net" network; Mabog Coffee sa Mabog Agricultural Industrial Producers Association sa Bislig City; Kahayagan Coffee sa Mabuhay-Kahayagan Coffee Growers Cooperative sa Surigao del Sur; ug Cahifo Coffee sa Calabuan Higaonon Farmers Association sa Agusan del Sur.
Aduna usab mga nagkalain-laing produkto nga gama gikan sa probinsya sa Agusan del Norte ingon man sa Caraga Region ang naka-display sa maong trade fair ug mamahimong bisitahe ang maong booth. (Karen Kei Decamutan, LGU-Agusan del Norte/PIA-Agusan del Norte)
