Orientation sa implementasyon sa TUPAD Program gipahigayon sa lungsod sa Loreto ug Tubajon
SAN JOSE, Dinagat Islands -- Gisugdan na ang 5th implementation sa citizen partners alang sa Tulong Panghanapbuhay para sa Displaced/Disadvantaged (TUPAD) workers sa lungsod sa Loreto ug Tubajon pinaagi sa Provincial Labor, Employment, and Manpower Office (PLEMO).
Adunay mikabat sa 100 ka citizen partners sa TUPAD sa lungsod sa Loreto ug 100 usab ang sa lungsod sa Tubajon diin giusa-usa pagpasabot sa DOLE ang mga guidelines sa TUPAD nga angayang sundon sulod sa 10 ka adlaw sa ilang pagtrabaho.
Atol sa gihimong pagbansay-bansay, ang nasangpit nga mga citizen partners mipirma usab sila sa ilang kontrata ug gihatagan sa ilang ID with QR code isip pamatuod nga sila TUPAD workers.
Dakong kalipay sa mga citizen partners nga nipasar ug nahimong kwalipikado base sa guidelines nga gipatuman sa Department of Labor and Employment (DOLE).
Sa iyang mensahe, gipasabot ni Gobernador Kaka Bag-ao kung asa gikan ang pondo sa maong programa ug kung nganong naghatag sila og pondo gumikan sa nakita nilang pagpaningkamot ug pagkugi sa mga Dinagatnon taliwala sa pandemya sa COVID-19 nga nasinati.
Gidasig usab sa gobernador ang mga citizen partners sa pagpabakuna aron makab-ot na sa mga naasoy nga barangay ang herd immunity aron anam-anam na nga mabalik sa normal ang lihok sa katawhan ug aduna na'y proteksyon ang matag usa.
Ang TUPAD program gipondohan ni Senator Joel Villanueva gumikan sa hangyo ni Gobernador Bag-ao nga kanunay ang pagprayoridad sa pagtabang sa mga katawhan ug mahatagan og trabaho ang mga Dinagatnon ilabi na kadtong naglisod sa pagpangita'g trabaho ug labing apektado tungod sa pandemya sa COVID-19.
Mitambong sa maong aktibedades si ex officio Board Member Absalon Colandog (Philippine Councilors League), ug ang mga opisyal sa barangay Diaz ug Roxas. (Dinagat Islands-PIO/PIA-Dinagat Islands)
