Entrepreneurial Mind-setting Seminar gihimo isip usa sa mga kalihukan sa pagsulog sa ikaduhang tuig sa Agusan Up
DAKBAYAN SA BUTUAN -- Mosuma sa 80 ka mag-uuma ug processors ang miapil sa gipahigayon sa probinsya sa Agusan del Norte pinaagi sa AGUSAN UP! Coordinating Center ug probinsyal nga buhatan sa Department of Trade and Industry (DTI]) nga Entrepreneurial Mind-setting & Marketing Essential Seminar kaniadtong Miyerkules, Nobyembre 10, 2021.
Gihimo ang maong kalihukan isip kabahin sa magkaluhang proyekto sa probinsya nga Plant! Plant! Plant! ug Process! Process! Process! ubos sa AGUSAN UP!, ang kampanya sa pagpalambo sa administrashon ni Gob. Dale B. Corvera kaabag ang buhatan ni Kong. Angel Amante-Matba.
Ang inputs ning maong seminar gihimo online apan ang mga partisipante personal nga nanambong sa mosunod nga mga Negosyo Centers sa DTI: Cluster 1 sa Negosyo Center sa Las Nieves; Cluster 2 sa Carmen, Nasipit ug Buenavista; Cluster 3 sa Cabadbaran, RTR ug Magallanes; ug Cluster 4 sa Tubay, Santiago, Jabonga, ug Kitcharao.
Tumong sa maong kalihukan nga mapataas ang kita diha sa pag negosyo pinaagi sa pagpalapad sa ilang kaalam unsaon pag-engganyo ang mga mamalitay sa ilang produkto.
Si John Paul Lanot, usa sa accredited mentor sa Philippine Center for Entrepreneurship ug gitawag nga “angelprenuer” o tigtabang sa laing mga entrepreneurs, ang nagsilbing mamumulong sa maong seminar.
Sa iyang mensahe, gidasig ni Gov. Corvera ang mga partisipante nga momugna og negosyo ug iyang gipadayag nga naa ra ang probinsya sa Agusan del Norte, ingon man ang mga nasudnong ahensya nga motabang kanila.
“Sa inyong pagtahak sa dalan sa pagka-entrepreneur, akong ipahibalo nga naa ra ang probinsya, ingon man ang partner tang mga ahensya ilabina sa DTI, nga mo suporta kaninyo,” sumala sa Gobernador. (Shena Mae Pabia, LGU-Agusan del Norte/PIA-Agusan del Norte)
