Bag-ong IPMR sa Agusan del Norte ginganlan na
DAKBAYAN SA BUTUAN -- Mihulip na isip Indigenous People Mandatory Representative (IPMR) sa Agusan del Norte si Datu Dakula Randy Catarman hulip kang Datu Bawang Eddie S. Ampiyawan kansang tulo ka tuig nga termino mahuman na karon Oktubre 20.
Sa iyang mensahe, daku kaayo ang pasalamat ni Datu Ampiyawan kang Gob. Dale B. Corvera ug Kongw. Angel Amante-Matba tungod sa ilang suporta aron mapahiluna ang iyang mga panglantaw isip lider sa Indigenous Peoples(IP) sa probinsya.
Sa iyang bahin, gipadayag ni Gob. Corvera ang iyang pagdayeg kang Datu Ampiyawan tungod sa mga ubay-ubay nga accomplishments nga iyang nahimo ubos sa iyang termino.
Usa sa gitan-aw ni Gob. Corvera nga accomplishments ni Datu Bawang mao ang pagpasa sa IP Code diin nakalatid ang nagka lain-lain programa, proyekto, benepisyo alang sa mga IPs sa probinsya.
“Daku ang akong kalipay sa atong pagkasayod nga aduna nay IP Code nga napasar sa Sangguniang Panlalawigan nga in the last nine months of my governorship (kongresista na ang gidaganan ni Gov. Corvera sa eleksyon sa Mayo 2022) maoy mahimo natong direction sa pagtahak sa dalan nga matagaan nato og tinuoray ug sinsero nga pagtagad ang atong mga kaigsuonang lumad,” sumala sa gobernador.
Dugang ni Gob. Corvera nga misalig siya ang mga nahimo ni Datu Ampiyawan ug ang mga himoon ni Datu Catarman sa iyang termino magdala gyod og kaayohan sa mga IPs sa probinysa.
Gipadayag usab ni incoming Provincial IPMR Datu Catarman nga mapadayon ang legasiya nga nahimo ni Datu Ampiyawan sa tulo ka tuig aron mas molambo pa ang kahimtang sa mga IPs sa probinsya sa Agusan del Norte.
Sumala ni IPMR Datu Catarman, ubos sa IPMR Code dunay mga panglantaw ug mga programa nga makab-ot kini pinaagi sa Information Education Campaign, Educational Assistance, Health and Medical Assistance, Establish of Tourism Sites sa mga Certificate of Ancestral Domain Title (CADT), Enhancement Trainings, Construction of IP Center, Palig-onon ang IP Defend System ug uban pa.
Sa maong pahayag ni Datu Catarman giseguro ni Gob. Corvera nga kaabag ang buhatan ni Kongw. Angel nga isip mga lider sa probinsya ihatag nila ang tibuok suporta ngadto kay Datu Catarman sama sa gihatag ng suporta kang Datu Ampiyawan.
Kini tungod
kay gusto tag mga lideres nga makahiusa sa tanang tribo aron mahimong sayon ang
pagpanghatag sa mga serbisyo.
“Kung unsa ang suporta nga atong gihatag uban kay Congresswoman Angel Amante-Matba kang Datu Bawang isip IPMR, mao usab kana ang suporta nga among ihatag kanimo Dakula Randy Catarman,” pahayag sa gobernador.
“Gusto namo makita nga magkahiusa ang tanang tribo tungod kay para ka namo kung magkahiusa ang tanang tribo dili usab magmakuli ang gobyerno paghatag og sinsero nga serbisyo kaninyo,” pasabot ni Gob. Corvera.
Mitambong usab sa seremonyas sila si Vice Gov. Ramon Bungabong, RD Lilibeth Famacion ug PD Ellen Chua sa DILG, RD Marlon Bosantog sa NCIP, NCIP Provincial Officer Serina Otao Molaan, PA Gerry Joey Laurito, PD Rey Cueva sa TESDA, LTCOL Julius Cesar Paulo sa 23rd Infantry Battalion sa Philippine Army, Mayor Enrico Corvera sa Nasipit, Provincial Board Members, mga IPMR sa mga lungsod mga personahe sa NCIP ug sa kapitolyo. (Shean Mae Pabia, Ydheil Zagado ug Sonny Montilla, LGU Agusan del Norte/PIA Agusan del Norte)
