Gidaghanon sa mga full vaccinated sa COVID-19 sa Tandag City kapin 8-mil na
By: Raymond Samson Aplaya
SYUDAD SA TANDAG, Surigao del Sur -- Muabot na sa 8, 719 ang gidaghanon sa mga fully-vaccinated nga mga indibidwal gikan sa A1, A2, ug A3 Priority Group subay sa nagpadayon nga coronavirus disease 2019 (COVID-19) Vaccination Roll Out dinhi sa siyudad sa Tandag.
Sa pakighinabi sa Radyo Pilipinas – Tandag, gibutyag ni Dr. Ruth Arraz, City Health Officer ning Siyudad, nga ang maong numero gamit na ang tulo ka mga brand sa bakuna nga mao ang AstraZeneca, Sinovac, ug Johnson&Johnson. Gawas niini, miabot na usab sa 6, 552 ang nakadawat sa ilang 1st dose gamit ang AstraZeneca ug Sinovac Vaccines kung diin nagpadayon pa usab ang pagpamakuna karon alang sa ilang 2nd dose.
Samtang sugod karong adlawa, sugdan na usab nila ang pagpamakuna gamit ang Moderna Vaccine.
Sumala pa nga adunay sila’y nadawat nga 150 doses sa maong bakuna nga alang sa A2 ug A4 Priority Group dinhi sa siyudad. Apan gipahibalo niini nga ang mabakunahan lang sa Moderna ilawom sa A4 Priority Group kadto lamang nag-edad 35-anyos hangtud 59-anyos subay sa patakaran sa Department of Health.
Haom matud pa kini alang sa mga OFW nga nakatakdang mugawas sa nasud nga mabakunahan na labi na karon nga wala pa’y naka – schedule nga pagpamakuna sa 1st dose gamit ang AstraZeneca ug Sinovac.
Subay niini, alang niadtong gustong magpabakuna sa Moderna, muadto lang sa City Administrators Office sa City Hall alang sa pre-registration. (Raymond Samson Aplaya - RP1 Tandag/PIA-Surigao del Sur)
