'Entrepreneurial farming training gihimo isip pagpangandam sa paglunsad sa proyektong 'food basket' sa Kitcharao
Ni LGU-Agusan del Norte
DAKBAYAN SA BUTUAN, Hunyo 10 -- Gisugdan niadtong Hunyo 8, ang una sa duha ka adlaw nga Entrepreneurial Farming Training alang sa mga mag-uuma nga mahimong kabahin sa paghimo sa lungsod sa Kitcharao nga “Food Basket” sa probinsya sa Agusan del Norte.
Kabahin ang maong pagbansay sa preparasyon sa gitakdang paglunsad sa proyekto pinaagi sa pagsugod na pagpanum og gulay karong Hunyo 15 isip kabahin sa mga kalihukan sa 54th Founding Anniversary sa probinsya sa Agusan del Norte.
Ang “Food Basket” mao ang Core Processing Project sa lungsod sa Kitcharao nga buligan pagpabarug sa mga mag-uuma sa gulay kaabag ang munisipyo ug ang probinsya pinaagi sa AGUSAN UP!, ang kampanya sa pagpalambo sa administrasyon ni Gob. Dale B. Corvera kaabag ang buhatan ni Kongw. Angel Amante-Matba.
Kabahin sa proyektong “Food Basket” ang pagpalambo og 500 ektaryas nga gulayan sa tibuok probinsya hangtud 2027, pagmontar og vegetable processing facilities nga mogama og vegetable powder, juices, nutrition packs ug uban pang preparasyon sa gulay ug pagpahiluna og mga marketing facilities and networks sa probinsya, sa Caraga ug sa gawas sa rehiyon.
Apil sa maong pagbansay nga gihimo sa Agricultural Learning Site sa lungsod ang 46 ka mga sakop sa Small Coconut Farmers Agrarian Reform Beneficiaries Multipurpose Cooperative [SCOFARBEMULCO], Zapanta Valley Bisaya Organization [ZABIOR], Zapanta Valley Farmers Association [ZAVAFA], Zapanta Mamanwa Manobo Association [ZAMMA], San Isidro Farmers Association [SIFA] ug mga mag-uuma sa Hinim Bangan ug Mahayahay.
Gi-facilitate ang pagbansay sa mga personahe sa Department of Trade and Industry [DTI]-ADN kaabag ang mga personahe sa Agusan Up Coordinating Center.
Sa unang adlaw gihisgutan ni Valentina Rose Orbita-Sagrado, personahe sa DTI nga kinahanglan mag budget sa kwarta ug oras, hustong pag plano sa capital, unsaon pag mintinar nga nagdagayday nga kwarta, keeping records, ug uban pang aspeto sa pagdumala sa pundo sa pag-uma.
Gihisgutan usab ang Basic Farm Cycle ug ipadayon ugma ang Negotiations and Cooperativism ug Processing of Farm Products. (Shena Mae Pabia, LGU Agusan del Norte/PIA-Agusan del Norte)
