11.10.2012

PIA News Service - Saturday, November 10, 2012


Cebuano news: Sitio sa Surigao Norte nasug-an na

Ni Susil D. Ragas

SURIGAO DEL NORTE, Nob. 10 (PIA) – Mokabat sa 30 ka mga panimalay sa Sitio Songkoy, Gigaquit ang nakasinati sa dakong kalipay dala sa sugang dagitab human gipahigayon ang ceremonial switch-on niadtong niaging adlaw Nob. 7, didto sa Barangay Gym sa Mahanub, Gigaquit.

Ang pagpasuga sa nasangpit nga barangay maoy kabahin sa Sitio Energization Program nga gi-implementar ubos sa administrasyon ni Pangulong Aquino pinaagi sa National Electrification Administration, diin tumong ug tinguha mao ang pagpasuga sa nahabilin nga 33,000 ka sitios sa nasod labi na sa Mindanao.

Ang maong kalihukan nahimo pinaagi sa panagtambayayungay sa Surigao del Norte Electric Cooperative Inc. sa pagpangulo ni Engr. Danny Z. Escalante ug sa pangagamhanang probinsya sa Surigao del Norte ubos sa liderato ni Governor Sol Matugas.

Ang nasangpit nga 30 kapanimalay nakadawat og libreng electric meter, light bulb, switch outlet, wiring ug libreng instalar. (PIA-Surigao del Norte)