9.29.2012

PIA News Service - Saturday, September 29, 2012

Tagalog news: Mga konsehal nagtanim ng mga puno sa eco park na tirahan ng buwayang si ‘Lolong’

Ni David M. Suyao

AGUSAN DEL SUR, Set. 29 (PIA) -- Sinimulan ng Philippine Counselors’ League (PCL)-Agusan del Sur Chapter ang Linggo ng PCL sa pamamagitan ng pagtatanim ng mga punong kahoy sa eco park sa Bunawan.
Ito ay hudyat nang pagsasaayos ng naturang eco park na siyang nangungunang programa ng pamahalaang bayan ng Bunawan at ng pamahalaang panlalawigan ng Agusan del Sur.

Sabi ng bise presidente ng PCL si Toto Bastareche, halos 500 ng puno ng mahogany ang kanilang naitanim sa mahigit kumulang dalawang hektaryang lupang itinalaga bilang eco park kung saan matatagpuan din ang may hawak ng World Guinness record na pinakamalaking buaya sa buong mundo na si Lolong.

“Humingi kami ng materyales sa Department of Environment and Natural Resources-Community Environment and Natural Resources Office (DENR-CENRO) na naka base sa Bunawan at naipagkaloob naman nila ito sa amin. Tumawag kami ng mga empleyado ng pamahalaang bayan at ng mga estudyante mula sa Agusan del Sur College of Agriculture and Technoloy (ASCAT) at di naman sila nag-atubiling tumulong sa amin na magtanim,” sabi ni Bastareche.

Ang PCL Agusan del Sur Chapter ay nangako ring susuportahan nila ang bayan ng Bunawan para mapanatili sa kanyang tirahan ang higanteng buwayang si Lolong.

Maliban sa plano ng Bunawan at ng PCL na mapaunlad ang eco park, ang pamahalaang panlalawigan ng Agusan del Sur ay naglaan din ng pondo para matustusan ang pagpaunlad ng eco park at nangako rin ang ibang ahensiya ng pamahalaan tulad ng DENR, Department of Public Works and Highways, Department of Agrarian Refrom at ng Provincial Agriculture Office. (PIA-Agusan del Sur)


Tagalog news: Mga ahensya ng gobyerno ipinagdiwang ang Nat’l Filipino Family Week

Ni Danilo S. Makiling

BUTUAN CITY, Agusan del Norte, Set. 29 (PIA) -- Ipinagdiriwang ng Regional Inter-Agency Committee on Filipino Family (RIAC-FF) na binubuo ng iba’t ibang ahensya ng pamahalaan ang Filipino Family Week na ginanap sa Balanghai Hotel ng lungsod.

Dinaluhan din ng RIAC-FF ang isang motorcade sa lungsod ng Butuan bilang unang aktibidad na isinagawa sa pagdiriwang. Ito ay dinaluhan din ng Philippine National Police (PNP) Band.

Sabi ni Maria Aurora Curaza-Maquiling ng Department of Trade and Industry (DTI) Caraga sa harap ng mga partisipante kasabay ng pagbubukas ng pagdiriwang, “Kailangan nating maglaan ng oras sa ating mga pamilya bagaman, nagtratrabaho po tayo ng subra sa oras na kailangan nating trabahuin, ika nga sa temang sa taon na ito na “Ensuring Work-Family Balance.”

Binigyang linaw din ni Maquiling na ang sobrang pagtratrabaho ay dahilan kung bakit kadalasan ay nawawalan na ng oras sa pamilya.

“Kailangan po nating siguruhin na maglaan ng oras sa pamilya bagaman nagtratrabaho po tayo ng maayos,” aniya.

Samantala, ang iba’t ibang pamilyang kumakatawan sa iba’t ibang ahensya ng pamahalaan ay nakilahok sa “Search for Talentadong Pamilyang Pinoy” kung saan ang bawat pamilya ay nagpakita ng kanilang mga talento sa pagsayaw at pagkanta.

Ang mga mananalo ay makatatanggap ng mga premyo tulad ng isang sakong bigas, P1,000 at iskolarship mula sa Technical Education and Skills Development Authority (Tesda) para sa first prize; P1,000 halaga ng grocery items at iskolarship mula sa Tesda para sa second prize; at P500 halaga ng grocery items at iskolarship mula sa Tesda para sa third prize. Makatatanggap naman ng consolation prizes ang mga hindi mananalo. (RER/NCLM/DSM/PIA-Caraga)