Work immersion sa Las Nieves, nakompleto sa 47 ka estudyante
LAS NIEVES, Agusan del Norte – Mga 47 ka senior high school (SHS) nga estudyante gikan sa Florida National High School (FNHS), Brgy. Florida, Butuan City ang malampusong nakakompleto sa ilang work immersion sa lokal nga panggamhanan sa Las Nieves, Agusan del Norte.
Gipahigayon ang culmination program niadtong Pebrero 17 sa municipal government lobby.
Gapasiugdahan ang maong aktibidad sa FNHS ubos sa pagdumala ni Ian S. Ortohan ug misalmot sa culmination program isip representante ni Ortohan si Elena M. Eduava, junior high school academic head; ug Eddie S. Mabale, SHS subject group head; uban usab ang mga magtutudlo sa SHS.
Mitambong sa maong kalihokan ang mga sakop sa Sangguniang Bayan, gipangulohan ni Bise Mayor Virgilio R. EscasiΓ±as Jr., apil usab si SB members Avelina S. Rosales, Domingo S. Mulig, Antonio N. Jongko, Francisco G. Namuag Jr., ug Jessica H. Navarroza; ug apil ang hepe sa nagkadaiyang buhatan sa LGU.
Ang work immersion usa ka mahinungdanon nga kabahin sa SHS curriculum nga naghatag og aktwal nga kasinatian sa trabaho sa mga estudyante. Sulod sa ilang immersion, nakakat-on sila sa mga proseso sa transaksyon sa munisipyo ug nakaangkon usab sila og kahibalo ug kahanas nga makatabang sa ilang umaabot nga propesyonal nga pagpanarbaho.
Gidayeg sa mga opisyal sa LGU Las Nieves ang dedikasyon ug kakugi sa 47 ka estudyante sa ilang work immersion. Gipasalamatan usab nila ang Florida National High School sa ilang pagsalig sa LGU alang sa maong programa.
Pinaagi sa padayon nga pakig-uban tali sa LGU Las Nieves ug mga institusyon sa edukasyon, nagpadayon ang pagpalambo sa kahibalo ug kasinatian sa mga kabatan-onan dili lamang sa lungsod, lakip na sa mga kasikbit nga komunidad niini. (MIO-Las Nieves, Agusan del Norte/PIA-Agusan del Norte)
