Sustainable, renewable energy mahimong posible sa Dinagat Islands
Subay sa tinguha nga mahatod ang Dinagat Islands sa industriyalisasyon, nibisita sa buhatan sa gobernador si Martine O. Navales, chief executive officer sa Solind Technology Corporation alang sa oryentasyon sa Renewable Energy Development sa probinsya.
Ang Solind Technology Corporation usa ka kompanya nga nakatutok sa renewable energy solutions, labi na sa mga inobasyon sama sa solar power, wind energy, ug hybrid systems, nga nagtinguha sa pag-promote sa sustainable technology ug clean energy.
Ang opisina sa gobernadora sa Dinagat Islands nagtan-aw sa mga paagi na madala ang probinsya sa kalamboan. Pinaagi sa limpyo ug renewable energy mahimong makab-ot ang gitawag na industrial growth samtang nagpadayon sa iyang pasalig sa pagpanalipod sa kina-iyahan.
Ang mga inobasyon sa Solind Technology, labi na sa solar power, wind energy, ug hybrid systems, makahatag og solusyon nga dili lang maghatag og konsistente nga kuryente, kini magpamenos usab sa carbon footprint, nga makatampo sa global nga paningkamot batok sa climate change.
Sigon pa ni Gov. Nilo P. Demerey Jr. ang pag install sa Solind Hybrid Power Trees, makahatag ug duha ka tumong: ang paghatag ug renewable ug hinlo nga enerhiya og mahimong maka-attract kini ug mga turista, nga magpalig-on pa sa reputasyon sa Dinagat Islands isip usa ka eco-tourism hub.
Ang kooperasyon tali sa Solind Technology ug panggamhang probinsyal naglatid sa usa ka plano alang sa pagdala sa Dinagat Islands sa industrialisasyon, gamit ang malimpyo ug renewable energy isip usa ka pundasyon sa kausaban, kini nagtinguha sa pagkuha sa dakong potensyal sa renewable sources aron maghatag ug enerhiya para sa umaabot nga mga proyekto sa probinsya para magpauswag ang industriya sa eco-tourism, agri-fisheries, ug mga lokal nga negosyo. Kini adunay dakong potensyal nga magmugna og bag-ong trabaho, ug maghatag og dugay nga kalamboan alang sa mga katawhan sa probinsya. (PIO PDI/PIA Dinagat Islands)
