Ticket scalping sa pantalan sa Nasipit, did-an
NASIPIT, Agusan del Norte -- Gidili na sa lungsod sa Nasipit ang scalping (ticket reselling) o pagpamaligya pag-usab sa mga tiket sa barko base sa bag-ong ordinansa nga gipasa sa Sangguniang Bayan ubos sa Municipal Ordinance No. 014-2024 nga gipangamahanan ni Sangguniang Bayan Member Felipe O. Abigan Jr.
Ang Anti-Scalping Ordinance, nga naporma subay sa resolusyon sa Port Management Advisory Council (PMAC) ug Port Facility Security Advisory Council (PFSAC), nagtinguha sa pagpanalipod sa mga pasahero batok sa pagpang-abuso sa presyo sa tiket.
Sumala sa ordinansa, ilegal ang pagpamaligya pag-usab sa mga tiket diin sa mas taas nga presyo, bisan pa kini buhaton sa personal o pinaagi sa online. Gidili usab sa mga authorized seller nga mo-engage sa bisan unsang kasabotan o transaction sa mga scalpers.
Giklaro sa ordinansa nga ang mga awtorisadong nagbaligya lamang sa tiket ang gitugotan sa operasyon niini.
Ang makasupak sa maong lakang pagamultahan sa katindad nga P2,500 o pagkapreso ug mao usab sa mga business entity apil na ang pagkansela sa lisensya sa pag-operate.
Gilauman nga pinaagi niini makatabang sa pagsulbad sa problema sa mahal nga presyo sa tiket sa barko ug pagpabilin sa hapsay nga pamatigayon sa pantalan sa Nasipit.
Sa pagpaningkamot ni Bokal Larry F. Bautista uban nila Bokal Dick Victor B. Carmona ug Francisco Y. Chan, Jr., isip mga co-authors, ang nasangpit nga lakang naaprobahan pinaagi sa Sanggunian Resolution No.037-2025 atol sa sesyon regular sa SP. (PLGU Agusan del Norte/PIA-Agusan del Norte)
