Dugang 770 benepesyaryo sa Agusan Norte ubos sa TUPAD, nakadawat na sa ilang sweldo
DAKBAYAN SA BUTUAN -- Mosuma sa 281 ka residente gikan sa mga lungsod sa BUENASCAR o Buenavista (131), Nasipit (99) ug Carmen (51) ang mikobra kaniadtong Enero 9, sa ilang P5,775 nga sweldo sa 15 ka adlaw nga trabaho ubos sa Tulong Panghapbuhay sa Disadvantaged/Displaced Workers (TUPAD) sa Department of Labor and Employment (DOLE) gamit ang pundo nga gipahiluna ni Kongresista Dale B. Corvera.
Kabahin ang 281 benepisyaryo sa BUENASCAR sa 770 tanan nga nakatrabaho nga wala na maapas pagsweldo sa bulan sa Disyembre ug apil sa 17,000 na tanan nga napatrabaho sa kongresista ubos sa TUPAD.
Sa nasabutan na’ng daan sa mga local government units, 60 porsyento sa mga nakatrabaho niini nga batch pagpananum ang trabahoon sa gikometer nga ektaryang tamnan sa fruit trees, mga gulay, high value crops, rehabilitation, ug ang 40 porsyento niini ma-assign sa laing trabahuon sa lungsod.
Sunod kini sa kampanya nil ani Kong. Corvera ug Gob. Ma. Angelica Rosedell M. Amante nga Plant! Plant! Plant!, ang kaluhang proyekto sa Process! Process! Process! ubos sa ilang kampanya sa pagpalambo nga mao ang AGUSAN UP!
Padayon ang pagpadangat og sweldo ugma sa mga lungsod sa Jabonga, Kitcharao, Santiago, Tubay, Cabadbaran City, RTR, ug Magallanes.
Nakapanukad na usab karon si Corvera sa iyang paningkamot pagpangalap og pundo alang sa laing hugna sa TUPAD niining tuiga ug gilantaw nga dugang pang mga Agusanon ang mahatagan niya ug temporaryong trabaho ubos sa TUPAD. (Agusan del Norte 1st Congressional District Office/PIA-Agusan del Norte)
