Usbaw sa sweldo sa mga job order sa kapitolyo sa Agusan Norte, gi-okehan
DAKBAYAN SA BUTUAN -- Ang tanang casual/job order nga empleyado sa kapitolyo sa Agusan del Norte makadawat og dugang inadlaw nga sweldo sugod Enero 2, 2025.
Kini ang unod sa Provincial Resolution No. 002-2024 nga gi-aprobahan bag-ohay pa lamang sa Sangguniang Panlalawigan nga ipatuman usab sa kapitolyo subay sa Caraga Wage Order No. RXIII-19 nga gi-adopt sa Regional Tripartite Wages and Productivity Board XIII ang bag-ong minimum wage rate sa rehiyon sa Caraga.
Gikan sa minimum wage nga P385, ipasaka kini ngadto sa P415 sugod Enero 2025 ug dugang nga usbaw P20 epektibo Mayo 1, ning tuiga.
Ang pag-usbaw sa ilang suholan giila sa lokal nga mga opisyal isip angayan tungod sa ilang kontribusyon sa mga kalamposan nga nakab-ot sa probinsya diin ang uban kanila naga-perform og vital tasks o assignments. Ang pag-umento usab sa maong sweldo dugang tabang sa mga trabahante hilabi na nga nagkataas ang presyo sa mga pamaliton karon.
Ang maong resolusyon giaprobahan sa pagpangamahan ni Bise-Gobernador Enrico R. Corvera atol sa ika-113th sesyon regular sa SP. (SD Gomez, PLGU Agusan del Norte/PIA-Agusan del Norte)
