Tribong Komunidad sa Las Nieves, nakadawat ug gasa
LAS NIEVES, Agusan del Norte -- Gipahigayon kaniadtong Disyembre 27 ang Pamaskong Handog Program sa interim Barangay Lawan-Lawan, ning lungsod.
Gipangunahan ni Mayor Karen Rosales ang pagpang-apod-apod sa mga food packs nga giandam sa lokal nga panggamhanan alang sa mga miyembro sa tribong Higaunon sa maong barangay. Kauban usab ni Mayor Karen sa maong kalihokan sila Avelina S. Rosales, Jacinto Fabro, Alberto Japitana, ug Balungagan Punong Barangay sa Lydia G. Fabro. Nakigtambayayong usab ang kanhi Liga ng mga Barangay President, Frederick P. Lumantas.
Ang mga personahe gikan sa Municipal Social Welfare and Development Office, ubos sa pagdumala ni Elde G. Japos Jr., nanguna usab sa maong aktibidad. Naghatag sila og sliced bread alang sa mga hamtong ug Jollibee meals alang sa mga bata.
Apil usab sa maong kalihokan ang mga child representatives gikan sa lain-laing barangay, kauban ang Municipal Local Government Operations Officer Myrna B. Libao, ug si Municipal Police Station Officer-in-Charge Charlon M. Montero. (MIO Las Nieves/PIA-Agusan del Norte)
