Kitcharao District Hospital opisyal na nga ngalan
Nasuta sa review sa komite nga ang Kitcharao Emergency Hospital, nga karon nailhan na isip KDH, natukod niadtong 1971 pinaagi sa paningkamot ni kanhi Congressional Rep. Guillermo R. Sanchez. Nagsugod kini sa operasyon isip usa ka emergency hospital niadtong Agosto 21, 1974 nga mao ang anibersaryo sa maong ospital.
Sukad kini natukod, dako na ang nahimong tabang sa KDH sa panglawas sa katawhan dili lamang sa lungsod apan lakip na ang lungsod sa Alegria, Surigao del Norte, ug uban pang kasikbit nga lugar, labi na sa panahon sa emerhensya. Sa pagkakaron, ang ospital accredited na sa PhilHealth ug pasilidad niini subay na sa standard sa usa ka infirmary-level nga ospital.
Nakadawat usab ang ospital og suporta gikan sa Philippine Charity Sweepstakes Program, pinaagi sa patient transport vehicle (PTV). Ang DOH Health Facility Enhancement Program nakasuporta sa renovation ug expansion sa emergency room ug nurse station sa KDH nga mipalambo sa kalidad sa serbisyo niini.
Ang resolusyon nag-ila sa papel ug kontribusyon sa KDH sa pagsiguro sa maayong panglawas alang sa komunidad. Kini usa ka dakong lakang padulong sa pagpalambo sa kalidad sa serbisyo sa panglawas alang sa tanan. (Jessica O. Mellejor, PLGU Agusan del Norte/PIA-Agusan del Norte)
