Multi-purpose building para sa senior citizens sa Barangay Santiago, Loreto, gi-turnover na
LORETO, Dinagat Islands – Gi-turnover na ang multi-purpose building para sa mga senior citizen nga nahimutang sa Purok 3, Sitio Cambinliw, Barangay Santiago sa Loreto, probinsya sa Dinagat Islands niadtong Disyembre 12.
Ang proyekto, pinaagi sa mga paningkamut sa mga opisyales sa Barangay Santiago nga gipanguluhan ni Punong Barangay Kimberly Salem-Madlos, ug sa lokal nga panggamhanan sa Loreto ubos sa administrasyon ni Mayor Doandre Bill A. Ladaga, isa ka ehemplo nga anaay kalambuan ang komunidad ug naga-suporta kini sa sector sa mga senior citizen.
Gikan ang maong proyekto sa 20 porsiyento sa Development Fund sa barangay nga P800,000 ug LGU fund nga P250,000. Dugang niini, gidawat usab sa Brgy. Santiago ang 50 plastic chairs nga donasyon ni Mayor Ladaga, ug dugang nga 50 plastic chairs gikan ni Dinagat Islands Governor Nilo P. Demerey Jr. ug Marco Demerey.
Gitambungan ang maong seremonya sa mga miyembro sa senior citizens sa Brgy. Santiago, opisyales ug empleyado sa sa BLGU sa Santiago, Municipal Administrator Joy Conales, Municipal Engineer Josielito Tokong, OSCA President Leo Bagalay, Retired Police Captain Jose Conales, mga miyembro sa Church of the Body of Christ ug representante sa RESAGA Constructions nga maoy contractor sa nahisgot na proyekto. (Jing Pelismino, MIO-Loreto/PIA-Dinagat Islands)
