Opisyales sa Zamboanga Norte nagpahigayon og benchmarking sa Agusan Sur
AGUSAN DEL SUR -- Nagpahigayon og benchmarking ang mga opisyales sa lungsod sa President Manuel Roxas sa Zamboanga del Norte kauban ang ilang mga hepe sa mga nagkadaiyang opisina dinhi sa probinsiya sa Agusan del Sur niadtong September 10.
Tumong sa grupo mao ang pagkat-on sa mga innovation nga gihimo sa panggamhanang probinsyal ilabi na mahitungod sa digitization ug paperless transactions.
Napili sa maong local government unit ang Agusan del Sur tungod matud pa sa Bise Mayor sa Roxas nga si Rolando G. Yebes Jr. nga walay lain nilang nakita nga nakasugod ug nanguna sa sama nga pamaagi.
“Sa kasamtangan, tradisyonal pa ang sistema nga gamit sa among lungsod,” matud ni Yebes.
Gani nahingangha ang ilang grupo sa ilang nasaksihan ug nakita nga mga kabag-ohan atol sa presentasyon nga gihimo sa mga technical personnel sa Provincial Information and Management Office (PIMO) sa pagpanguna sa ilang hepe nga si Engr. Nephtali F. Morgado.
“Gusto sa among grupo nga makat-on kutob sa among maarangan. Kung dili mi modawat sa mga kausaban ug dili mangita og tabang walay gihapon kami mapadulngan,” dugang sa bise mayor. (Ronald S. Notarion, PPIO-ADS/PIA-Agusan del Sur)
