Mag-uuma sa Agusan Sur mapasalamaton sa programang USAD
PROBINSIYA SA AGUSAN DEL SUR -- Nakahaw-as na sa kalisod ang usa ka mag-uuma human mokita sa kapin P30,000 matag bulan tungod sa tabang sa probinsiya sa Agusan del Sur pinaagi sa programa nga Upland Sustainable Agri-Forestry Development (USAD).
Ang mag-uumang si Milbert Lobrino sa Sitio Sta. Cruz, Barangay Del Monte, Talacogon nagbutyag nga lisod kaayo ang ilang kahimtang kaniadto sa wala pa siya naapil sa USAD.
“Sa una, lisod gyud ang among panginabuhi. Nagapasuhol lang mi, mangbalsada ug mangabang pa og kabaw,” matod ni Lobrino.
Apan human nagpa-enroll si Lobrino sa USAD sa tuig 2019, siya gitunolan og suporta sa probinsiya pinaagi sa paghatag sa iyang mga panginahanglanon sa pagpanguma lakip niini ang libreng training mahitungod sa bag-ong pamaagi sa panguma, libreng mga semilya, mga medisina ug abono.
Unang gitanom ni Lobrino ang cacao nga 600 ka punoan sulod sa usa ka ektaryang luna, apan dili pa kini produktibo sa kasamtangan.
Dayon siya mitanom na usab og saging nga lakatan nga moabot sa 2,000 ka punoan sa iyang duha ka ektaryang luna niadtong tuig 2022.
Tungod niini, ug uban sa iyang paningkamot ug kakugi, kasamtangan siyang naga-harvest og 400 ngadto sa 500 kilos nga lakatan matag kinsina nga mohatag kaniya og kita nga mokabat sa P37,000 - P47,000 kada bulan.
“Sa pagkakaron, medyo hayahay na gyud ang among kahimtang. Nakapalit na gani ko og mga gamit, motor ug nakapaeskwela sa mga bata. Dako na kaayo ang kalahian kumpara sa una,” dugang pa ni Lobrino.
Tungod niini, nagpaabot sa iyang kinasingkasing nga pasalamat si Lobrino ngadto sa probinsiya, sa programang USAD ug sa mga opisyales nga nagpaluyo niini.
“Dako ang akong pasalamat sa USAD ug sa mga nagpaluyo niini, sa atong Gob. Santigo Cane Jr., kauban sa mga opisyales sa probinsiya ilabi na gyud kay Congressional Representative Eddiebong Plaza nga maoy hinungdan namugna ang USAD,” pahinapos nga saysay ni Lobrino. (PPIO-Agusan del Sur/PIA-Agusan del Sur)
