5th mng’t committee meeting sa DepEd-13, gipahigayon sa Dinagat Islands
DINAGAT ISLANDS– Miarangkada na ang 5th Management Committee Meeting (MANCOM) sa Department of Education (DepEd) Caraga nga gipahigayon ngadto sa Kamanting Grill and Restaurant, Sta. Cruz, San Jose, Dinagat Islands niadtong Agosto 12-14.
Kini nga panagtigom naghiusa sa schools division superintendents, assistant schools division superintendents, regional functional division chiefs, ug uban pang focal persons gikan sa tibuok rehiyon aron pagahisgutan ug planohan ang mga lakang para sa sektor sa edukasyon niining rehiyon.
Si Caraga Regional Development Council Chairperson ug Dinagat Islands Gov. Nilo P. Demerey Jr., MPM anaa sa pagbukas sa aktibidad nga mainiton usab nga giabi-abi ang mga partisipante sa maong kalihukan. Si Gov. Demerey nagpamatuod pag-usab sa iyang hugot nga suporta sa mga adbokasiya sa DepEd, ilabi na sa pag-amuma sa mga estudyante. Gipasiugda usab sa gobernador ang kamahinungdanon sa panaghiusa ug iyang giawhag ang tanan sa pagtinabangay aron masiguro nga matag-bata sa Dinagat Islands ug sa tibuok rehiyon sa Caraga makaabot sa ilang hingpit nga potensyal.
Anaa usab ang 2024 National Science and Technology Fair nga mga kampyon gikan sa PDI nga sila Kurt Lawrence B. Cuaton, Ehdraemrahnt H. Castro, ug Kriscel Mae J. Rollo, diin nagpresentar sa ilang research paper nga, "Spatial Modelling on Suitable Areas for Shallow Tube Well (STW) in the Province of Dinagat Islands: A GIS Approach."
Gihisgotan usab ang pagpuno sa mga bakanteng posisyon sa departamento, pagpahapsay sa mga proseso sa pag-hire, pag-assess sa pagpahigayon sa mga klase, ug uban pa. Kini nga mga hilisgutan mahinungdanon sa pagpauswag sa kalidad sa edukasyon ug pagsiguro sa hapsay nga operasyon sa mga inisyatibo sa DepEd Caraga.
Ang DepEd Schools Division sa Dinagat Islands, pinangulohan ni Florence Almaden ug sa iyang technical working group, maoy nagdumala sa maong kalihukan uban sa pakigtambayayong sa provincial government sa Dinagat Islands ug Remedy Aksyon Center. (Gov. Nilo P. Demerey Jr./ PIA-Dinagat Islands)
