Dairy box sa Cabadbaran, abli na
CABADBARAN CITY, Agusan del Norte -- Pormal na nga gi-turnover ug gi-inagurahan ang Dairy Box o Carabao-based Business Improvement Network (CBIN) Project, nga nahimutang sa Purok 2, Hinagdanan, Comagascas, Cabadbaran City niadtong August 9.
Sa ngalan ni City Mayor Judy Chin Amante, si City Councilor Indigenous Peoples Mandatory Representative (IPMR) Benefredo Manlubatan ang mi-welcome sa mga bisita, samtang gipasabot usab ni Philippine Carabao Center, Musuan Bukidnon Center Dir. Lowel C. Paraguas ang rationale sa maong proyekto.
Gipangunahan ni Department of Agriculture - Philippine Carabao Center Deputy Executive Dir. Caro B. Salces ang ceremonial turnover, kauban ang representante ni Senator Cynthia A. Villar nga maoy tinubdan sa pondo sa maong proyekto isip chairperson sa Senate Committee on Agriculture and Food and Agrarian Reform, nga si Genome A. Fortun, Orencio Corvera nga nag represent ni Agusan del Norte 2nd district Congressional Rep. Dale B. Corvera, Agusan del Norte Gov. Maria Angelica Rosedell M. Amante, Cabadbaran City Councilor IPMR Manlubatan, ug Laudegrace B. Tumarlas ang chairperson sa Maong Farmers Cooperative (MAFCO) nga maoy benepisyaryo sa maong proyekto uban ang paghatag sa iyang message of acceptance.
Mihatag usab ug mensahe si PCC Head of Operations Edwin Atabay, ug message of support usab gikan kang Gov. Amante, kon diin iyang gidasig ang tanang myembro sa MAFCO nga palamboon ang maong dakung proyekto nga gitahas ngadto kanila.
Kahinumduman nga una nang nakadawat ug 56 ka buhing kabaw ang maong grupo sa mag-uuma aron maoy mo produce ug gatas nga e-process sa Dairy Box aron mahimong lamian nga ilimnong fresh milk uban ang lain-laing flavors niini, nga pwede na mapalet sa katawhan.
Mapasalamaton usab si Cabadbaran City Agriculturist Maria Arceli C. Soria nga sa syudad sa Cabadbaran gyud napahimutang ang maong dakung proyekto.
Samtang si Rev. Fr. Michael Casinillo sa Nuestra Senora Del Rosario, Soriano Parish, Cabadbaran City ang nanguna sa pag bendisyon sa maong facility nga aduna nay kompletong kagamitan sa pag proseso sa gatas sa kabaw aron mamahimong lamian nga ilimnong gatas. (Roselyn Gangca Exaure & Winworth F. Morales, Cabadbaran City/PIA-Agusan del Norte)
