Insentibo sa sports medalists sa Agusan Norte, gipatas-an
DAKBAYAN SA BUTUAN -- Sa tuyo nga mas maningkamot pa ang mga atleta ning probinsya sa Agusan del Norte, gipatas-an na ang ganti nga ilang madawat panahon nga sila makadawat og medalya sa sports competitions sa sulod o gawas sa nasod basi sa giamendahang ordinansa alang niini.
Sigon sa Provincial Ordinance No. 707 nga gipangamahanan ni Bokal Rodulfo A. Pitogo, tsirman sa SP Committee on Education and Culture, kini ang insentibo nga madawat sa usa ka medalist sa 3 ka kategorya sa sports competition: Regional: gold – P30K, silver – P20K, bronze – P15K; National: gold – P50K, silver – 30K, bronze – 20K; ug international: gold – P60K, silver – P40K, ug bronze – P20K.
Gituhoan nga ang pagtaas sa kantidad sa insentibo, makatabang aron mas maningkamot pa ang mga atleta’ng Agusanon alang sa dungog sa probinsya.
Ang maong ordinansa giaprobahan sa Sangguniang Panlalawigan sa ika-93 niini regular nga sesyon agi’g tubag sa sulat-hangyo ni Gob. Ma. Angelica Rosedell M. Amante nga patas-ang ang nasangpit nga insentibo. (PLGU-Agusan del Norte/PIA-Agusan del Norte)
