Pagpananum ubos sa TUPAD, nagpadayon sa Agusan Norte
DAKBAYAN SA BUTUAN -- Nagpadayon karon ang pagpananum sa kapin sa 100 nga nakatrabaho ubos ning laing batch sa Tulong Panghanapbuhay sa Ating Disadvantaged/Displaced Workers (TUPAD) nga gipahiluna ni Kongresista Dale B. Corvera sa lungsod sa Nasipit.
Mosuma sa 239 sa nakatrabaho sa Nasipit, 60 porsyento kanila ang mikometer pagmugna og nurseries ug pagtanum og gulay, ubang crops aron sa ngadto-ngadto mapahiluna ang giako nga core processing projects sa lungsod nga mao ang bamboo processing, ug ang “Cacao City.”
Dala sa kakulang pa sa seedlings, ang gitanum nila karon mao ang mga gulay sa demonstration farm sa lungsod ug mga kahoy sa daplin sa mga dalan sa may national highway.
Ubos sa TUPAD, nga gipadagan sa Department of Labor and Employment (DOLE), sweldoan ang matag usa og P385 ang adlaw o P5,775 tanan sa 15 ka adlaw nga trabaho.
Sa kinatibuk-an dugang 1,848 ka residente sa Agusan del Norte ang nakatrabaho sugod sa miaging semana ubos ning maong hugna sa TUPAD.
Gawas nga makatabang diha sa paghatag og libuang trabaho sa probinsya, giplastar ni Corvera nga makatabang usab ang TUPAD pagpahiluna og mas permanenting tinubdan sa kita ang mga makatrabaho ubos niini nga programa. Gilambigit usab ni Corvera ang TUPAD sa hiniusang kampanya sa pagpalambo nila ni Gob. Ma. Angelica Rosedell M. Amante nga mao ang Plant! Plant! Plant! ug Process! Process! Process! sa AGUSAN UP! (John Henry Balansag, mga hulagway sa PESO-Nasipit/Agusan del Norte 2nd Congressional District/PIA-Agusan del Norte)
