Senior high school achievers sa Dinagat Islands, nakadawat ug cash incentives gikan sa prov’l gov’t
DINAGAT ISLANDS -- Padayon sa paghatag og pahalipay ug pasidungog ang provincial government of Dinagat Islands sa pagpangulo ni Gov. Nilo P. Demerey Jr. ngadto sa senior high school students sa probinsya niining school year (SY) 2023-2024, diin gipahigayon ang maong aktibidad ngadto sa Provincial EOC Function Hall, Sta. Cruz, San Jose.
Mga 59 ka estudyante gikan sa 30 ka-senior high schools sa Dinagat Islands ang midawat og pasidungog gikan sa probinsya. Ang mga top 1 achievers adunay cash incentives nga mikantidad og P5,000, ug usa ka plaque of recognition. Samtang ang mga top 2 achievers midawat og kantidad nga P3,000 ug plaque of recognition.
Isip representante sa gobernador., anaa si Security Officer IV Nilo Marco M. Demerey nga personal nga nagpaabot og mainitong pagbati ngadto sa mga estudyante ug sa mga ginikanan niini. Kini nga aktibidad nagmalampuson usab pinaagi sa Provincial Community Affairs Office (PCAO).
Anaa sa maong kalihukan ang presensya nila OIC-Assistant Schools Division Superintendent (OIC-ASDS) Bryan L. Arreo, CESE; CID Chief ES Lope C. Papeleras; ug Dr. Mila O. Geraldino, chief of the School Governance and Operations Division (SGOD). Uban usab ang mga personahe sa PCAO sa pagpanguna ni Jay Benitez ug Devico Emfimo, mga personahe sa Provincial Treasury Office, ug uban pa. (PIO-PDI/PIA-Dinagat)
