Agusan Norte nanghatag ug 12 ka ekipo, makinarya pang-agrikultura
DAKBAYAN SA BUTUAN -- Isip suporta sa agricultural development sa probinsya sa Agusan del Norte, hugtanong gipalabang sa Sangguniang Panlalawigan ang Sanggunian Resolution No. 204-2024 nga naghatag otoridad kang Gob. Ma. Angelica Rosedell M. Amante alang sa pagpirma sa transfer without cost sa 12 ka units nga ekipo ug makinarya diin ipanghatag sa mga agricultural associations ug munisipalidad ning probinsya.
Nagkantidad ang maong mga ekipo ug makinarya og P1,921,800 nga gilangkuban sa 4 ka units sa mud boat Ttller, 3 ka mechanical corn sheller, 3 ka multi-commodity solar tunnel dryer, 1 ka pressure cooker ug 1 ka unit sa weighing scale.
Ang 4 ka mud boat tiller gihatag sa Guinabsan Farmers Association, Makugihon Rosario Farmers Association ug Nagpabilin sa kadumalahan sa Higaonon sulod sa CADT-118, samtang ang 3 ka mechanical corn sheller gipahimutang sa E.G. Montilla Farmers Association, Lekda Higaonon Farmer Producers Cooperative ug Green Kalikasan Farmers Association.
Ang 3 ka multi-commodity solar tunnel gibutang sa Caloc-an Small Scale Commercial Fishing Association, Caasinan Fisherfolk Association Inc. ug E. Beltran Farmers & Fisherfolk Association ug ang pressure cooker ug weighing scale gihatag sa Ata-Atahon Rural Improvement Club.
Pinaagi sa pagpaningkamot ni Bokal Ryan Jade D. Lim, tsirman sa komitiba sa Human Settlement, Land Use and Provincial Properties, inabagan nila Bokal Rodulfo Pitogo ug Bokal Dick Victor Carmona mipasar kini atol sa ika-81 nga sesyon regular niadtong Abril 23 ning tuig. (RJSE, PLGU-Agusan del Norte/PIA-Agusan del Norte)
