Toolkits gi-apod-apod sa mga iskolar sa Agusan Norte
Ang maong programa gipahigayon niadtong Mayo 29 ngadto sa Al Fresco, Fishyalan sa Northern Mindanao School of Fisheries nga nahimutang sa lungsod sa Buenavista diin nahimong kabahin ang TESDA sa hiniusang liderato ni Gov. Ma. Angelica Rosedell M. Amante ug 2nd District Congressional Representative Dale B. Corvera.
Mga 332 ka mga iskolar gikan sa lungsod sa Santiago, Magallanes, Nasipit, Buenavista, Carmen, Jabonga ug syudad sa Cababaran ang nakadawat og tag-isa ka shovel, wheelbarrow, plastic pale kun baldi ug manual knapsack sprayer alang sa land preparation para sa Agricultural Crop Production NC III nga kurso.
Nakadawat usab og tag-isa ka hydraulic jack ug combination wrench ang 70 ka mga benepisyaryo sa Driving NC II, ug 50 ka mga katawhan sa Carpentry NC II diin nadawatan nila ang electric hand drill, makute ug portable circular saw.
Dako ang pagsalig ni Rep. Corvera sa mga nakadawat, nga ang mga nakat-unan, kahibalo ug kahanas gikan sa pagbansay mahimong steppingstone sa pag-gamit ug pag apply sa mga toolkits nga ilang nadawat sa pagpanginabuhi.
Gisiguro sa kongresista ug ni Gov. Amante nga magpatuman pa sila og dugang serbisyo, programa ug mga oportonidad nga makasuporta sa mga katawhan sa probinsya aron maminusan ang kalisod sa pagpanginabuhi.
Gipaabot usab ni Atty. Juselle Tricia S. Roble isip representante ni Mayor Joselito T. Roble nga gamiton sa saktong pamaagi ang mga toolkits nga nadawat.
Anaa sa maong programa si Vice-Governor Enrico R. Corvera nga midayag sa iyang mensahe ngadto sa mga benepesyaryo kauban sila Bokal Erwin L. Dano, tsirman sa Committee on Agriculture and Agrarian Reform. (PLGU-Agusan del Norte/PIA-Agusan del Norte)
