Fire auxiliary training, gipahigayon sa Las Nieves
LAS NIEVES, Agusan del Norte – Nagmalampuson ang gipahigayon nga duha ka adlaw nga Community Fire Auxiliary Group (CFAG) Annual Training 2024 sa lungsod sa Las Nieves nga gipasiugdahan sa Bureau of Fire Protection (BFP) sa Las Nieves ubos sa pagdumala ni Municipal Fire Marshal Arniel P. Goloran.
Gitambongan kini sa mga CFAG members gikan sa 20 ka mga barangay sa Las Nieves para mapagpalig-on ang kahibalo ug kahanas sa mga partisipante mahitungod sa paglikay sa sunog.
Kabahin sa pagbansay mao ang pagtudlo sa mga CFAG members sa basic fire response pinasubay sa guidelines sa BFP.
Ang pagpahigayon sa CFAG gisuportahan sa Municipal Peace and Order Council ubos sa pagdumala ni Mayor Karen Rosales.
Ang pagsuporta sa maong programa giseguro subay sa pagtoo nga pinaagi sa maong training, mas mapalig-on ang kahanas sa mga miembro sa CFAG ug mahimo silang aktibo ug andam kanunay sa pagresponde hilabi na sa kabarangayan.
Mitambong usab si Myrna B. Libao, ang municipal local government operations officer sa lungsod.
Misalmot usab sa aktibidad ang mga punong barangay ug uban pa nga opisyales sa gipahigayon nga pagbansay. (MIO-Las Nieves/PIA-Agusan del Norte)
