Pag-monitor sa presyo sa palaliton sa Rosario, Agusan Sur gipakusgan
AGUSAN DEL SUR -- Malampuson ang gipahigayon nga Local Price Coordinating Council (LPCC) meeting sa Rosario, Agusan del Sur niadtong Abril 17, aron hisgutan ang mga isyung may kalabutan sa presyo ug supply sa mga nag-unang palaliton sa lungsod.
Sa maong panagtigom, mi-presentar og resulta sa pag-monitor sa presyo ug supply sa mga nag-unang palaliton ang matag miyembro sa nagkadaiyang ahensya subay sa giingon sa Republic Act No. 7581 o Price Act.
Matud pa sa representante sa Municipal Agriculture Office (MAO) nga si Delia Valenzuela, sinemana ang ilang gibuhat nga price monitoring sa mga agricultural products uban sa marine, meat, dairy, ug mga farm inputs. Samtang ang Department of Trade and Industry (DTI) mi-presenter usab og resulta sa monitoring niini sa presyo sa mga nag-unang palaliton nga mao ang mga manufactured ug processed goods.
Dugang gipadayag sa DTI nga mi-issue kini og price freeze sa mga nag-unang palaliton ilawom sa hurisdiksyon niini ug dali nga mipahigayon ug price and supply monitoring human sa pag-deklara og State of Calamity (SOC) sa probinsya epekto sa walay undang nga ulan ug pag-baha niadtong Enero ning tuiga. Ang maong price freeze natapos kaniadtong Abril 2, 2024.
Nagpasaka usab og resolusyon ang konseho aron sa pagbutang og price board sa merkado aron sayon nga makita sa mga konsumador sa Rosario ang presyo sa mga nag-unang palaliton sa lungsod ug malikayan ang kalit nga pagtaas sa mga presyo.
Ang gipahigayon nga meeting gipangunahan sa Mayor’s Office nga si Luis II Espinosa isip representante ni Mayor Jose T. Cuyos, Sr. nga giilang chairperson sa LPCC-Rosario. Uban usab si Engr. Renato S. Corvera ug Ferdinand Inres sa DTI-Agusan del Sur isip vice-chairperson ug uban pang miyembro sa konseho. (DTI-Agusan del Sur/PIA-Agusan del Sur)
