Tribal cultural center giinagurahan sa Tagbina
TAGBINA, Surigao del Sur (PIA) -- Sa pagpakita og garbo sa kultura pinaagi sa pagtinabangay sa pagdumala, ang lokal nga panggamhanan sa Tagbina, ubos sa pakigtambayayong sa komunidad sa Katawhang Tribu, pormal nga gisaulog ang inagurasyon ug opisyal nga pagpatigayon sa pagpasa og kaakuhan sa pagdumala kon “turnover” ngadto sa lokal nga panggamhanan og sa mga tribu, sa dugay nang gipaabot nga indigenous people (IP) cultural center, niadtong Abril 2 sa lungsod sa Tagbina, Surigao del Sur.
Ang mahinungdanong okasyon gitambongan kini sa halangdon nga bisita gikan sa buhatan sa Department of Social Welfare and Development (DSWD) nga si Undersecretary Monina Josefina "Pinky" H. Romualdez.
Ang maong okasyon sumala pa timaan sa usa ka mahinungdanong lakang alang sa kalambuan padulong sa pagpreserbar ug pagpalambo sa kinaiyahan og kultura sa mga tribu.
Ang maong proyekto, gipondohan pinaagi sa DSWD-Kapit-Bisig Laban sa Kahirapan-Comprehensive and Integrated Delivery of Social Services (KALAHI - CIDSS or KC) PAyapa at MAsaganang PamayaNAn (PAMANA) Community Driven Development Program for Indigenous People (IP-CDD) ug gidugangan sa lokal nga kontribusyon nga pundo gikan sa lokal nga panggamhanan sa Tagbina, ubos sa pagdumala ni Mayor Glaiza Jane Polizon Lanete.
Ang kalampusan sa maong proyekto nagsilbi nga usa ka simbolo sa pag-uswag ug panaghiusa sa tibook katawhang lumad sa lungsod og sa kasikbit niining kumunidad sakop sa probinsya.
Ang seremonyas gipasiugdahan sa mga tinahod nga mga bisita, kauban sila Atty. Bernadette A. Mapue-Joaquin ang DSWD national program manager; DSWD Caraga Regional Director Mari-flor A. Dollaga-Libang; NCIP Regional Director Ordonio P. Rocero Jr.; Hinatuan Mayor Shem G. Garay, mga opisyales sa konseho,barangay, empleyado, ug mga tribu. (Glenn B. Lazaro, LGU-Tagbina/NGPB, PIA-Surigao del Sur)
