Mas gipadool nga skills training, gitinguha sa TESDA
LAS NIEVES, Agusan del Norte -- Gipahigayon sa Las Nieves ang Provincial-Wide Community Training and Employment Coordinator's (CTEC's) meeting, bag-ohay pa lamang sa Barangay Malicato.
Ang panagtigom gitambungan sa tanan nga CTEC gikan sa nagkadaiyang lungsod ug syudad sa Agusan del Norte.
Mitambong isip representante sa lokal nga panggamhanan si kahing mayor ug Sangguniang Bayan member Avelina S. Rosales.
Mitambong usab ang mga representante sa 23rd Infantry "Masigasig" Battalion, Philippine Army, pinangunahan ni Captain Emmanuel J Corpus.
Gipresentar sa panagtigom ang Memorandum of Understanding tali sa Technical Education and Skills Development Authority (TESDA) ug mga lokal nga panggamhanan aron maseguro ang malampuson nga implementation sa TESDA sa Barangay Program.
Gilantaw sa TESDA nga pinaagi sa programa maseguro ang hugot nga pagpatuman sa community-based training program ngadto sa mga suok nga dapit sa tibuok probinsya.
Ang maong programa pinasubay sa tumong sa TESDA nga mas mapadool ang ilang serbisyo ngadto sa mga lagyong komunidad ug mahimo kining tulay para makaangkon sila ug opportunidad.
Ang pag-arangkada sa TESDA sa Barangay pagahimoon pinaagi og MOU/MOA signing nga ipahigayon karong March 22, 2024.
Sa iyang mensahe gipaabot ni TESDA Provincial Director, Carlito Quintano, ang iyang dakong pasalamat kang Mayor Karen S. Rosales sa iyang suporta sa mga aktibidades sa TESDA sama sa CTEC meeting ug sa pagpahigayon sa community-based trainings (CBT's) ug community-based training and enterprise development (CBTED) para sa mga people's organizations (PO's) sa lungsod. (MIO-Las Nieves/PIA-Agusan del Norte)
