Pag-upgrade sa ospital sa Cabadbaran ngadto level I, giawhag
DAKBAYAN SA BUTUAN -- Giawhag sa probinsya ang Department of Health (DOH) nga i-upgrade na ang Cabadbaran District Hospital ngadto sa usa ka level 1 hospital.
Kini pinaagi sa Sanggunian Resolution No. 085-2024, nga gipangamahanan ni Bokal James T. Reserva, tsirman sa Committee on Health and Nutrition kauban sila Bokal Rodulfo A. Pitogo ug Bokal Dick Victor B. Carmona.
Mahibulaan nga ang Cabadbaran District Hospital anaa pa sa lebel nga infirmary hangtod karon. Apan sa pagkakaron ang maong ospital aduna nay daghan kalamboan sama sa Out-Patient building, multi-purpose laundry building, doctor's quarter, materials recovery facility, dugang power house, laboratory building og uban pang pasilidad nga gikinahanglan aron mopasar kini isa hangyo himoong kining level 1.
Dako’g tabang matod pa kung ang maong ospital ma-upgrade tungod kay mas daghan naman ang maakomodar nga mga pasyente dili lang sa syudad sa Cabadbaran apan lakip ang tibook probinsya ug kalakbit nga mga LGUs sa Caraga nga nanginahanglan og epektbo ug epesyente’ng medikal nga atensyon.
Ang maong resolusyon usa sa prayoridad sa administrasyon ni Gob. Angel Amante nga nalakip sa Executive-Legislative Agenda (ELA) sa probinsya nga gidahum nga matuman gilayon tungod sa kamahinungdanon niini alang sa katawhang Agusanon. (Reel Francisco Deligero, PLGU-Agusan del Norte/PIA-Agusan del Norte)
