Paghimo og police uniforms sa Kitcharao, i-regulate na
PCTTO
DAKBAYAN SA BUTUAN -- Aron pagpanalipod sa produksyon sa PNP uniforms batok niadtong iligal nga nagahimo niini, i-regulate na sa lungsod sa Kitcharao ang paghimo nini pinaagi sa Municipal Ordinance No. 118.
Sakop sa maong ordinansa nga gipanginahan ni Kitcharao SB Member Ingrid R. Archinue ang polisiya sa munisipyo sa paghimo, pagbaligya sa PNP uniform, insignians ug accoutrements (gamit sama sa badge) aron protektahan kini gikan sa illegal nga produksyon sa maong uniform mapisikal man, online o digital nga mga plataporma.
Tungod niini, gimando nga kun kinsa man ang magtukod ug mag-operate og negosyo sama niini sulod sa lungsod, kinahanglan magkuha og Certificate of Conformity pinaagi sa Directorate for Research and Development sa Philippine National Police.
Hugot nga gimando usab nga dili ibutyag ang mga importanteng impormasyon sa iyang mga kostumer gawas lang kon ang PNP mopahigayon ug verification sa iyang operasyon sa establisimento.
Multahan ang molapas niini nga ordinansa og P2,500 sa unang paglapas. (LGU-Kitcharao/PIA-Agusan del Norte)
