Kritikal nga pasyente sa COVID-19, i-refer sa Caraga Regional Hospital
 |
| File photo |
DAKBAYAN SA BUTUAN -- Atol sa gipahigayon nga ika-75th regular sesyon sa 19th Sangguniang Panlalawigan sa Agusan del Norte sa pagpanguna ni Bise Gob. Enrico R. Corvera, kauban ang mga SP members, gitagaan og pagtugot si Gob. Angel Amante nga permahan ang Memorandum of Agreement taliwala sa provincial government of Agusan del Norte ug Caraga Regional Hospital para sa referral system sa mga grabe ug kritikal nga mga pasyente sa COVID-19 sulod sa Agusan del Norte Provincial Hospital.
Tungod sa kakulangan sa mga pasilidad ug mga kagamitan, ang una nga partido (Province of Agusan del Norte) miuyon niini nga i-refer ang tanang mga pasyente nga kritikal ang kondisyun tungod sa COVID-19 ngadto sa ikaduhang partido (Caraga Regional Hospital) nahimutang sa Surigao City nga gipanguluhan ni Dr. Cheryl A. Gotinga aron mahatagan kini ug saktong tambal.
Nahisulat usab sa maong MOA nga ang unang partido magpahibalo usa ngadto sa ikaduhang partido sa referral sa dili pa dad-on ang pasyente. Ihatod ang mga pasyente gamit ang COVID-19 vehicle ug kini pagaubanan ug doktor ug usa ka nars.
Ang maong resolusyon gi-aprobahan sa pagduso ni Bokal James T. Reserva, tsirman sa Committee on Health and Nutrition kauban sila Bokal Rodulfo A. Pitogo ug Bokal Dick Victor B. Carmona. (Reel Francisco Deligero, PLGU-Agusan del Norte/PIA-Agusan del Norte)
