Agusan Norte contingency plan batok infectious disease, aprobado na
DAKBAYAN SA BUTUAN -- Aron maandam na ang katawhan sa probinsya sa Agusan del Norte batok sa makatakod nga sakit sa umaabot, i-implementar na ang Agusan del Norte Contingency Plan on Emerging and Re-emerging Infectious Disease human kini gi-aprobahan sa Sangguniang Panlalawigan bag-ohay pa lamang.
Ang maong contingency plan resulta sa usa ka konsultasyon sa mga stakeholders sa probinsya nga gipangunahan sa Provincial Health Office basi sa COVID-19 situational report sa maong buhatan.
Gikinahanglan matod pa nga aduna nay kongkretong plano ang matag local government unit kun unsay buhaton sa gobyerno kun ugaling aduna na usa’y infectious disease nga mogawas ug mokanat sama sa milabay nga COVID-19 virus nga nakalitan ang tanang nasod og miresulta sa daghang kalas sa kinabuhi sa tibook kalibutan lakip na ang pagkaparalisa sa mga ekonomiya ug pagkawala sa panginabuhian sa daghang katawhan.
Partikular, nagtumong ang maong plano nga maplastar ang usa ka epektibo ug epesyenting sistema kabahin sa emerging and re-emerging infectious disease disaster preparedness sa panahon nga ideklara ang usa ka State of Public Health Emergency ning probinsya.
Sa nahimong pagtuon, ang emerging infectious disease mao ang Severe acute respiratory syndrome (SARS) virus nga naggikan sa nasod sa Taiwan nga nakatakod sa usa ka residente sa Nasipit ug usa usab nga taga Las Nieves, hinungdan nga nabutang ang probinsya sa Modified Enhanced Community Quarantine (MECQ) niadtong milabay nga duha ka tuig diin nauso ang COVID-19.
Sa re-emerging infectious disease usab, gipananglitan ang sakit nga malaria nga matod pa, bag-ohay pa lamang, midaghan sa sa mga lungsod sa Jabonga, Tubay, Las Nieves, Kitcharao, Cabadbaran city, Carmen ug Buenavista nga sulod sa lima ka tuig nga milabay, wala man untay kaso sa maong sakit sulod sa Agusan del Norte.
Nagatuo ang mga opisyales ning probinsya sa liderato ni Gob. Angel Amante ug ang Sangguniang Panlalawigan nga kini nga contingency plan makatabang og dako sa pagprotekta ug pagluwas ug mga kinabuhi lakip na ang pagmentinar sa mintal ug psychosocial stability sa katawhan ug paghatag og hinanaling health care services sa mga apektadong popolasyon sa umaabot.
Ang nasangpit nga contingency plan unod sa gi-aprobahan’g Sanggunian Resolution No. 620-2023 sa pagpangamahan ni Bokal Rodulfo A. Pitogo sa rekomindasyon sa Provincial Disaster Risk Reduction and Management Council (PDRRMC). (JVDemain, PLGU-Agusan del Norte/PIA-Agusan del Norte)
