Residente sa insurgency-free barangays sa Las Nieves, nakadawat ug libreng serbisyo
LAS NIEVES, Agusan del Norte -- Kapin 400 ka mga taga Las Nieves ang nakadawat ug libreng serbisyo gikan sa lokal nga panggamhanan sa Las Nieves sa gipahigayon nga Las Nieves Cares Community Immersion Serbisyo Caravan nga ginatawag "Lanie Cares 2023."
Ang Lanie Cares 2023 adunay duha ka hugna nga gipahigayon sulod sa bulan sa Disyembre nga gisugdan kaniadtong December 13 sa Barangay Katipunan ug nahuman kaniadtong December 14 sa Barangay Tinucoran.
Ang Lanie Cares 2023 usa ka programa sa Municipal Peace and Order Council sa Las Nieves. Pinasikad kini sa Executive Order No. 70, series of 2018 nga nagmando sa pagpatuman sa whole-of-nation approach aron wagtangon ang local communist armed conflict.
Ang maong mga barangay nagpabilin nga insurgency-free bunga sa pagtinabangay sa lokal nga panggamhanan sa Las Nieves ug sa 23rd Infantry “Masigasig” Battalion (23IB), Philippine Army.
Mitambong si Mayor Karen S. Rosales sa pagpahigayon sa serbisyo caravan sa parehon barangay para ipakita ang iyang hugot nga suporta sa katawhan.
"Bisan duol na kamo sa panggamhanan, mas ipadool pa gyud namo ang serbisyo sa inyo,” ingon ni Mayor Rosales atol sa pagpahigayon sa maong programa sa Barangay Tinucoran.
Dugang pa sa mayor, gusto niya nga walay mabiyaan nga barangay sa lungsod ug ang tanan makaangkon gayud sa serbisyo sa gobyerno.
Gidayeg ug gipasalamatan usab ni Rosales ang suporta sa mga lokal nga opisyales sa maong mga barangay ngadto sa mga programa ug serbisyo sa panggamhanan.
Ang Rural Health Unit sa Las Nieves, ubos sa pagdumala ni Doc. Rose Marie Dolores C. Ruelan, nagpahigayon og libreng health check-up, bakuna kontra trangkaso ug pneumonia, x-ray imaging, dental check up, prenatal, tuli, ug pagpanghatag ug tambal.
Mipahigayon usab og libreng gupit ang Charlie Company, sa 23rd Infantry “Masigasig” Battalion, Philippine Army, nga giuluhan ni 1Lt. Bench Kevin Ormilla.
Anaa usab ang Local Civil Registrar nga midawat ug aplikasyon para sa birth certificate registration ug pagpakasal, samtang nanghatag usab ang Assessor's Office og tax declaration.
Miadto usab ang Municipal Agriculture’s Office (MAO), nga inuluhan ni Leonito Pasquito ,nga nanghatag sila ug mga liso sa tanom ug bitamina alang sa mga binuhing mananap. Nagpahigayon usab ang MAO og pagpangbakuna kontra rabies.
Naa usab ang Department of Trade and Industry (DTI) nga mitabang sa mga nagparehistro sa ilang mga negosyo.
Aduna food packs nga gipanghatag ang Municipal Social Worker and Development Office (MSWDO), nga inulohan ni Leoncia R. Calang, nga adunay sulod nga bugas ug mga de lata.
Nabusog usab ang mga bata sa gipahigayon nga feeding program sa mga tunghaan sa maong mga barangay. Nalipay usab sila sa mga school supplies nga gihatag kanila.
Mitambong usab sa maong kalihokan si Vice Mayor Virgilio EscasiΓ±as Jr.,
Councilor Avelina S. Rosales, ug ang uban pang miyembro sa Sangguniang Bayan.
Misuporta usab ang Bureau of Fire Protection-Las Nieves nga giuluhan ni Municipal Fire Marshall SFO3 Arniel Goloran, ingon man ang Municipal Police Force sa lungsod ubos sa pagdumala ni Police Captain Charlon M Montero. (MLGU-Las Nieves/PIA-Agusan del Norte)
