(PAGASA 24-HOUR PUBLIC WEATHER FORECAST as of Tuesday, 05 March 2024) Northeast Monsoon affecting Luzon. Butuan City, Agusan del Norte, Agusan del Sur, Dinagat Islands, Surigao del Norte and Surigao del Sur, will experience partly cloudy to cloudy skies with isolated rainshowers or thunderstorms due to Easterlies/Localized Thunderstorms. Possible flash floods or landslides during severe thunderstorms. Moderate to strong winds coming from Northeast to East will prevail with moderate to rough seas (1.2 to 2.8 meters).


Wednesday, 22 November 2023

P15.3-B iniliaan para sa Pilipinong manggagawa sa abroad

Inihayag ni Department of Budget and Management (DBM) Secretary Amenah F. Pangandaman ang paglalaan ng gobyerno ng P15.3 bilyon sa ilalim ng panukalang 2024 national budget para sa Department of Migrant Workers (DMW) upang makapaghatid ng mas malaking tulong at proyekto para sa mga migranteng manggagawang Pilipino.

“Sa ilalim ng pamumuno ni Pangulong Ferdinand R. Marcos Jr., hinding-hindi po pababayaan ng ating pamahalaan ang kapakanan ng ating mga migrant workers. They are our heroes. Dapat lang na sila po ay matulungan at maalalayan, lalo na sa panahon ng krisis. Katuwang po nila kami sa DBM. Katuwang po nila ang pamahalaan,” pagdidiin ni Secretary Pangandaman.

Tinukoy ni Secretary Pangandaman na kasama sa panukalang budget ang pondo ng Overseas Workers Welfare Administration (OWWA) Emergency Repatriation Program (ERP) na may alokasyong P9.7 bilyon para matulungan ang mga OFW na sapilitang pinauuwi.


Karagdagang P1.2 bilyon naman ang inilaan para sa Agarang Kalinga at Saklolo para sa mga OFW na Nangangailangan (AKSYON) Fund, na siyang nagbibigay ng legal, medikal, pinansiyal, at iba pang uri ng tulong sa mga OFWs, kabilang ang repatriation, pagbabalik sa bansa ng katawan ng mga yumaon, evacuation, rescue, at iba pang klase ng proyekto upang protektahan ang karapatan ng mga Pilipino.

Naglaan naman ng P13 milyon sa OFW hospital and diagnostic center upang suportahan ang mga medikal na pangangailangan ng mga OFW at kanilang qualified dependents.

Naaayon ang nabanggit na proyekto sa mithiin ni Pangulong Ferdinand R. Marcos Jr. na isulong ang interes ng mga migranteng manggagawang Pilipino at protektahan sila sa mga sitwasyon ng krisis.

Karagdagang suporta para sa mga migrant workers mula sa OWWA fund

Samantala, pinaglaanan naman ng P9 milyong dagdag na pondo ang Balik Pinas, Balik Hanapbuhay Program (BPBH), na may kabuuang alokasyong P440.115 milyon sa susunod na taon. Ang BPBH ay isang pakete ng livelihood support na naglalayong magbigay ng agarang tulong sa mga umuuwing Overseas Filipino Workers (OFWs). Layon ng programa na magbigay ng entrepreneurship development training at cash assistance na nagkakahalaga ng P20,000 bilang start-up o karagdagang kapital.

Maliban dito, may karagdagang P227.995 milyon ang inilaan sa Tulong Pangkabuhayan sa Pag-Unlad ng Samahang-OFWs (TULONG PUSO) na layong suportahan ang pagbuo, pagpapahusay, o pagpapanumbalik ng mga proyektong pangkabuhayan ng mga organisasyong OFW.

Palalakasin din ang mga pamilya ng OFWs sa paghahanapbuhay sa pamamagitan ng mga negosyo na magbibigay sa kanila ng tuluy-tuloy na kita, sa tulong ng P18 milyon na inilaan sa OFW Enterprise Development and Loan Program (EDLP). Alinsunod sa Republic Act No. 10801, ang EDLP ay isang enterprise development intervention ng OWWA katuwang ang Land Bank of the Philippines (LBP) at ang Development Bank of the Philippines (DBP), na tutulong din sa mga pamilya ng OFW na lumikha ng mga oportunidad na trabaho sa kanilang komunidad. (DBM/PIA-Caraga)