Feeding program sa Las Nieves, gipakusgan
LAS NIEVES, Agusan del Norte -- Gipakusgan pa ang supplemental feeding program sa lungsod sa Las Nieves, Agusan del Norte pinaagi sa paghatag og dugang suporta gikan sa lokal nga panggamhanan.
Kaniadtong Martes, pormal nga gi turnover ang mga nag-unang kagamitan aron magamit sa pagpatuman sa maong programa sama sa mga eating utensils nga gilangkuban sa yahong, kutsara, tinidor, baso, plato ug usa ka refrigerator.
Ang mga himan pormal nga gidawat sa mga day care workers nga gikan sa nagkadaiyang barangay sa lungsod.
Mokabat sa P515,000 ang gigahin sa lokal nga panggamhanan sa Las Nieves aron mapakusgan ang feeding program ilabi na sa kabarangayan.
Ang pagpondo sa feeding program support pinasubay sa executive agenda ni Mayor Karen Rosales diin apil niini ang pagseguro sa kahimsog sa katawhan sa lungsod, ilabi na ang mga kabatan-onan.
Sa mensahe ni Michael Mandahinog, ang representante sa mayor, iyang gitagaan og pagtagad ang dakong tabang sa mga day care workers isip kaabag sa panggamhanan sa pag implementar sa feeding program.
"Isa gyud sa gilantaw ni Mayor Karen nga ang atong mga kabatan-onan sa Las Nieves mudako nga baskog ug himsog," nagkanayon ni Mandahinog.
Gi-turnover usab ang mga Early Childhood Care Development (ECCD) learning resource packages ngadto sa mga day care workers.
"Daku ang among pasalamat kang Mayor Karen ug sa lokal nga panggamhanan niining mga eating utensils nga among magamit among feeding program activities,” matud pa ni Arnel O. Timo, usa ka day care worker gikan sa Barangay Lingayao.
Si Jofran Candar, nga gikan sa Barangay Pinana-an nagpadalamat usab sa administrasyon sa paghatag og prayoridad sa feeding program sa lungsod.
Mitambong sa turn-over ceremony si Leoncia R. Calang, ang municipal social welfare and development officer sa Las Nieves. (MIO-Las Nieves/PIA-Agusan del Norte)
