P58-B inilaan sa hudikatura para sa mas epektibong pangangasiwa ng hustisya sa bansa
Sa gitna ng pagsisikap ng administrasyon ni Pangulong Ferdinand
R. Marcos Jr. na maging mahusay at maaasahan ang pangangasiwa ng hustisya sa
bansa, naglaan ang Department of Budget and Management (DBM) ng P57.79 bilyon
para sa sangay ng Hudikatura sa ilalim ng panukalang 2024 national budget.
Ayon kay DBM Secretary Amenah F. Pangandaman, mas mataas ang
alokasyon para sa sangay ng Hudikatura sa susunod na taon kumpara sa
kasalukuyang pondo nitong P54.91 bilyon sa Fiscal Year 2023 General
Appropriations Act.
“The recommended level for the Judiciary represents 1.0020
percent of the total government expenditure program to fast-track the
much-needed reforms in the administration of justice as envisioned by the
Judiciary, Executive, and Legislative Advisory and Consultative Council
(JELACC),” pahayag ng budget secretary.
Naka-angkla sa temang, "Agenda for Prosperity: Securing a
Future-Proof and Sustainable Economy," ang pinapaaprubahang Fiscal Year
2024 national budget na nagkakahalagang P5.768 trilyon.
Mula sa nasabing halaga, P27.65 bilyon ang inilaan para sa
adjudication program ng Supreme Court of the Philippines and the Lower Courts
(SCPLC), Sandiganbayan, Court of Appeals (CA), at Court of Tax Appeals (CTA).
Patuloy ding ipatutupad ng Hudikatura ang Justice System
Infrastructure Program (JUSIP), na susuportahan ng P4.19 bilyong alokasyon sa
capital outlays para sa konstruksyon, pagkukumpuni, at rehabilitasyon ng mga
hall of justice sa buong bansa.
Maliban dito, mayroon ding P1.442 bilyon na nakalaan para sa mga
kinakailangan sa ICT tulad ng Cybersecurity solutions, pag-renew ng security
applications ng SC, pagpapabuti ng koneksyon at mga server ng data, at pagbuo
ng mga e-Filing at e-Service Module sa ilalim ng justice sector convergence
program.
Sa layon namang magpatuloy ang pagsasagawa ng bar examinations sa isang
computerized na format at mapanatili ang momentum ng paglipat tungo sa isang
technology-driven na Hudikatura, ang alokasyon para rito ay itinaas sa P720.956
milyon mula sa P510 milyon nitong pondo ngayong 2023. Samantala, ang Special
Shari'ah bar examinations ay may alokasyong P100 milyon sa FY 2024 NEP.
(DBM/PIA-Caraga)
