Kabuhayan ng mga Pilipino, nanatiling prayoridad sa panukalang 2024 budget
Muling binigyang-diin ni Department of Budget and Management
(DBM) Secretary Amenah F. Pangandaman ang paninindigan ng administrasyon na
palawigin pa ang mga programang pangkabuhayan sa pamamagitan ng panukalang 2024
National Expenditure Program (NEP).
“It is the Administration’s fervent hope that this budget will continue to lay
the groundwork for future-proofing the economy and making the country’s growth
inclusive and sustainable, not just for the Filipinos of today, but also for
the future generations,” pahayag ni Secretary Pangandaman.
Mga livelihood at emergency employment program ng DOLE
Naglaan ang pamahalaan ng P2.28 bilyon para sa Integrated
Livelihood Program ng Department of Labor and Employment o DILP, na naglalayong
tumulong sa kabuhayan ng mga disadvantaged workers, indibidwal man o
grupo.
Tinutugunan ng DILP ang pangangailangan ng mga komunidad na na
isinasaalang-alang ang regional o local development priorities tulad ng
off-farm/non-farm livelihood diversification sa rural agricultural economy at
key employment generating sector (KEGS)-related projects.
Samantala, mula sa alokasyong P16.4 bilyon para sa DOLE
Livelihood and Employment Program, nasa P12.9 bilyon ang mapupunta sa Tulong
Panghanapbuhay sa Ating Disadvantaged Workers (TUPAD) Program.
Bukod dito, naglaan ng P406.88 milyon para sa Adjustment
Measures Program (AMP) upang magkaloob ng safety net program na susuporta sa
mga proyekto at programang nagbibigay trabaho, kabuhayan, at iba pang
pangangailangan ng mga Pilipino.
Mga livelihood program ng DSWD
Upang mapaigting pa ang kakayahan ng mga mahihirap na Pilipino
na makapasok sa mga oportunidad na makatutulong sa kanilang kabuhayan, may
panukalang P5.62 bilyon para sa Sustainable Livelihood Program ng Department of
Social Welfare and Development (DSWD).
Mayroon namang alokasyong P549 milyon para sa Implementation and
Monitoring of PAyapa at MAsaganang PamayaNAn (PAMANA) Program, na naglalayong
palawakin ang access ng mga komunidad sa socio-economic interventions.
Pagtutok sa sector ng agrikultura at pangingisda
Aabot sa P1.35 bilyon ang panukalang pondo para sa Aquaculture
Sub-Program ng Department of Agriculture na target palakasin ang teknolohiya ng
bansa para sa breeding at larval rearing ng mga isda at siguruhin ang mataas na
kalidad ng mga produkto.
Bahagi rin ng paglaban sa kahirapan, sa pamamagitan ng
agricultural and fishery interventions, ang alokasyong P1.09 bilyon para sa
Special Area of Agricultural Development (SAAD) Program Phase 2.
Karagdagang P210.9 milyon naman ang inilaan sa Major Crop-based
Block Farm Productivity Enhancement Program ng Department of Agrarian Reform na
naglalayong palakasin ang produksyon at kakayahang kumita ng mga sakahang
pagmamay-ari ng Agrarian Reform Beneficiaries (ARBs).
Maliban sa mga nabanggit, may mga programang pangkabuhayan ang Department of
Migrant Workers, Department of Trade and Industry, at Department of Science and
Technology upang higit na maiangat ang kabuhayan ng mga Pilipino sa susunod na
taon. (DBM/PIA-Caraga)
