PLGU AgNor, PECAN may bag-ong kasabotan
Ang CNA hiniusang kasabutan tali sa gobyerno ug mga empleyado sa probinsya nga nag-unod sa mga katungod ug mga prebilihiyo sa mga empleyado isip trabahante niini.
Pipila sa maong mga katungod nga suportado sa pamunoan sa panggamhanang probinsyal mao ang mosunod: 1) paghatag professional ug skills enhancement ngadto sa mga empleyado sama sa scholarship grants sa undergraduate ug post graduates; 2) training, 3) mortuary aid ngadto sa pamilya sa empleyado panahon sa iyang pagpanaw, 4) access sa COA audited financial reports, PHRMO merit and promotion plan, annual investment plan, annual budget ug uban pang dokumento sa mga transaksyon sa probinsya; 5) CNA bonus matag Disyembre nga kuhaon sa surplus sa operasyon sa panggamhanang probinsyal human ang usa ka tuig, ug uban pang prebilihiyo nga pila na ka tuig nga natagamtaman sa mga trabahante sa probinsya.
Lakip usab sa kasabutan nga adunay representasyon ang PECAN sa mga komitaba nga namugna sa panggamhanang probinsyal sama sa Grievance Machinery Committee, Personnel Selection Board, Fact-Finding Committee, ug Performance Monitoring Team.
Sa liderato ni Gob. Angel Amante, makasiguro matod pa ang mga empleyado nga suportado ug protektado sa probinsya ang ilang mga katungod.
Narehistro ang PECAN sa Department of Labor and Employment niadtong Septyembre 1995 isip asosasyon sa mga trabahante sa panggamhanang probinsyal. Kasamtangang mga opisyales niini mao sila si Dr. Procerfina Santillan (SPO) isip presidente, Dave Luison (PHO) isip bise president sa internal affairs, Joy Banguis (PBO) isip bise president sa external affairs, Darlette Ouano (PDRRMO) isip Secretary, Jhoan Roa (PACCO) isip Treasurer, Pauline Batucan (PTO) isip Auditor ug Abril Romano (PSWDO) isip P.I.O.
Aduna nay otoridad ang gobernador sa pagpirma sa maong CNA pinaagi sa Sanggunian Resolution No. 427-2023 nga giaprobahan sa SP sa ika-49 regular nga sesyon. (PLGU Agusan del Norte/PIA Agusan del Norte)
